Qazaqtyń ūlttyq kıímderí qaıtadan sánge aınalyp barady. Ásírese Nauryz merekesí jaqyndaǵanda ūlttyq kıímmen kózge túsetínderdí kóp kóretín boldyq. Óńírlík kommunıkatsıyalar qyzmetíníń ókílderí óz ómírín osy qūraq óneríne arnaǵan Aısūlu Qojaevanyń sheberhanasyna baryp qaıtqan edí, – dep habarlaıdy aqshamnews.kz tílshísí.
Aısūlu Qojaeva — ómírín osy íske arnaǵan úlken sheber. Ol tígín tígudí bala kezínen úıreníptí. Jastaıynan kórpe tíguge qyzyǵyp, ásem dúnıeler jasaudy armandaıdy. Bíraq qu tírlík oǵan kezínde mūrsha bermegen eken.
Súıíktí ísíne Aısūlu zeınetke shyqqan soń ǵana qaıta oralǵan. Qūraq kórpe tígu alǵashynda jan tynyshtyǵyn tabatyn hobbı sıyaqty boldy. Uaqyt óte kele osy ísín ózí sıyaqty qyzyǵatyn ózge adamdarǵa da úırete bastapty.
Qazír onyń tuyndylary jaı ǵana qoldan jasalǵan būıym emes, qaıta jańǵyryp jatqan mádenıettíń bír bólígí bolyp otyr. Qazaqtyń ūlttyq kıímí men qolónerí qaıta órleu dáuírín bastan ótkeríp, qaıta sūranysqa ıe boldy.
Sheberdíń aıtuynsha, onyń būıymdaryna sūranys joǵary eken. Dástúrlí elementter men aksessuarlar qaıtadan sán bolyp, jármeńkede jaqsy satylyp jatyr. Satyp alushylardy qazaqylyq qyzyqtyra bastaǵan.
Shapandaryn Aısūlu túgel qolmen tígedí. Bír būıymdy jasauǵa shamamen bír aı uaqyt ketedí eken. Ol oyu-órnektí de ózí oılap tabady: aldymen qaǵazǵa syzyp alyp, keıín matanyń betíne túsíríp, tígín mashınasymen mūqıyat óńdeıdí. Osylaısha dástúrlí naqyshtardy avtorlyq kózqaraspen úılestíredí.
Kıímnen bólek, sheber kórpe, japqysh pen jastyq ta tígedí. Būl jūmysqa odan da kóp uaqyt ketedí: ár mata qıyndysy túsíne qaraı tańdalyp, qolmen qıylyp, bírtūtas kompozıtsıyaǵa bíríktíríledí. Osylaısha ájeníń sandyǵynan shyqqandaı bolyp kórínetín erekshe būıymdar dúnıege keletín kórínedí.
Aısūlu úshín shyǵarmashylyq — quanysh pen íshkí tepe-teńdíktíń qaınar kózí. Ūzaq uaqyt tíkpese, kóńílí túsíp ketetínín aıtady, ásem dúnıeler jasaǵanda jany jadyrap, qūrys-tūrysy jazylyp, bír jasap qalatynyn aıtady.
Almatydaǵy Oqushylar saraıynda sheber qyzdarǵa arnalǵan úıírme de ashqan. Onda olar sómke, qobdısha sıyaqty shaǵyn būıymdar men sándí nárseler tígíp úırenedí. Osylaısha ūlttyq dástúr ūrpaqtan ūrpaqqa mūra bolyp qalyp jatyr.
Nauryz merekesí qarsańynda ūlttyq kıímge degen qyzyǵushylyq erekshe artady. Qoldyń būıymdary estetıkalyq qūndylyq qana emes, erekshe quat ta syılaıdy. Sheberlerdíń aıtuynsha, eger būıymdy baryńdy salyp jasasań, ol da ıesíne míndettí túrde bereket pen paıda alyp keledí eken.