Álemdík sayahatshylar qauymdastyǵynda Qazaqstan óziniń sheksíz dalasymen, asqaq taularymen jáne tabıǵattyń bíregeı kóríktí oryndarymen tanymal. Alaıda íshkí turızmdí damytu tek jarnamalyq buklettermen shektelmeıdí. Qazaqstan Respublıkasynyń Prezıdentí Kasym-Jomart Tokaev bírneshe ret atap ótkendeı, turızmdí damytu – būl el ekonomıkasyna tíkeleı ınvestıtsıya, jańa jūmys oryndaryn qūruǵa jáne óńírlerdíń damuyna múmkíndík beretín mańyzdy baǵyt, – dep habarlaıdy aqshamnews.kz tílshísí.
Jyl basynda Memleket basshysy eldíń turıstík áleuetíne taǵy da nazar audaryp, Almaty qalasyn táulík boıy qarqyndy tírshílík etetín álemdík megapolıster deńgeıíndegí qalaǵa aınaldyru jónínde auqymdy míndet qoıdy. Būl rette negízgí basymdyqtardyń bírí – túrlí tabys deńgeıíndegí turısterdí tartatyn tauly turıstík klasterdí damytu bolyp tabylady.
Sonymen qatar Prezıdent turızm salasynda sheshudí qajet etetín máselelerdí de naqty atap óttí. Atap aıtqanda, ekologıyalyq turızmdí damytu kóp jaǵdaıda tek tanystyrylymdar deńgeıínde qalyp, ís júzínde tolyq júzege aspaı jatqanyn aıtty. Memleket basshysynyń píkírínshe, turızm – ekonomıka, mádenıet jáne qauípsízdík salalary ózara toǵysatyn kúrdelí júıe. Sondyqtan būl salada tek kásíbı mamandar men óz elíníń patrıottary qyzmet etuí tıís.
Qazaqstan Respublıkasy Úkímetíníń málímetínshe, turıster aǵynyn arttyru jáne salanyń ınvestıtsıyalyq tartymdylyǵyn kúsheıtu maqsatynda barlyq qajettí jaǵdaılar jasaluda. Burabaıdan Mańǵystauǵa deıíngí kurorttyq aımaqtardy damytu boıynsha keshendí josparlar ázírlengen. Almaty qalasynyń mańyndaǵy tauly aımaqta 30 jańa aspaly jol salu jáne 160 shaqyrymnan astam shańǵy trassalaryn damytu josparlanyp otyr. Būl óz kezegínde jyl saıynǵy turıster sanyn 5 mıllıon adamǵa deıín arttyruǵa múmkíndík beredí. Sonymen qatar turıstík nysandarǵa aparatyn jergílíktí mańyzy bar joldardy jóndeu jūmystary da qatar júrgízílude. 2025 jyly būl maqsatqa 360 mıllıard teńgeden astam qarjy bólíngen.
«Turızmdí damytu – tek ekonomıkalyq míndet qana emes, sonymen qatar azamattardyń konstıtutsıyalyq qūqyqtaryn júzege asyru bolyp tabylady. Qazaqstan Respublıkasy Konstıtutsıyasynyń 27-babynda demalu qūqyǵy azamattardyń kepíldendírílgen áleumettík ıgílígí retínde bekítílgen. Qoǵamda keıde būl normalardyń mazmūnyna qatysty píkírtalastar tuyndaǵanymen, Eńbek mınıstrlígíníń túsíndíruínshe, konstıtutsıyalyq normalardy jańartu azamattardyń qūqyqtaryn shektemeıdí, kerísínshe olardyń qūqyqtyq negízín jetíldíredí. Demalu qūqyǵyn júzege asyrudyń naqty tetíkterí, sonyń íshínde jyl saıynǵy eńbek demalysy Qazaqstan Respublıkasynyń Eńbek kodeksínde naqty kórsetílgen. Osylaısha, óz elí boıynsha sayahattau múmkíndígí – árbír qazaqstandyqtyń ajyramas qūqyǵy, al memleket būl qūqyqty zamanauı ınfraqūrylym arqyly qamtamasyz etuge ūmtylady», – dep atap óttí MITU kolledjíníń dırektory Maıra Shalabaeva.
Osyndaı auqymdy josparlardy júzege asyru úshín qonaqjaılyq ındustrıyasy salasynda bílíktí mamandar qajet. Turızm salasyndaǵy negízgí kadrlyq qūram – bolashaq gıdter, turıstík agenttík menedjerlerí jáne qonaq úı qyzmetkerlerí – negízínen kolledjderde dayarlanady.
Ortalyq Azıyadaǵy «jańa stıl astanasy» retínde Almaty qalasy CNN Travel nūsqasy boıynsha tanylǵandyqtan, mūnda turızm salasyna mamandar dayarlau erekshe mańyzǵa ıe. Almaty qalasynyń kolledjderínde studentter tek teorıyalyq bílím alyp qana qoımaı, alǵashqy kurstan bastap kásíbı ortaǵa beıímdeledí. Máselen, MITU kolledjínde studentter turpaket qūrylymy, qonaq úılerdí jíkteu, qaqtyǵystar psıhologıyasy, turıstík destınatsıyalar marketıngí sıyaqty keń auqymdy pánderdí meńgeredí.
«Bízdíń ūstanymymyz boıynsha, turızmdí tek audıtorıyada otyryp oqyp úırenu múmkín emes. Sondyqtan bíz salamen tyǵyz yqpaldastyqqa basymdyq berdík. Studentterímíz turıstík agenttíkterde tájírıbeden ótedí, aqparattyq turlarǵa qatysady, sondaı-aq sheteldík qonaq úılerde taǵylymdamadan ótu múmkíndígíne ıe. Mysaly, bízdíń studentímíz Janıya Djakanova Túrkıyadaǵy qonaq úıde jarty jylǵa juyq tájírıbeden ótíp, qazírgí uaqytta ekínshí mausymǵa shaqyrtu aldy. Būl – bílím beru sapasynyń naqty kórsetkíshí», – dedí Maıra Shalabaeva.
2025 jyldyń qazan aıynda kolledj oqytushylary STEP.UP.TRAVEL atty jastar kásípkerlík ortalyǵyn qūrdy. Būl joba tolyqtaı studentterdíń bastamasyna negízdelgen: olar turıstík marshruttar ázírlep, gıd qyzmetín atqaryp, óz qatarlastaryna arnalǵan sayahattardy ūıymdastyrady. Osy uaqytqa deıín Túrgen shatqaly men Kólsaı kólderíne turıstík saparlar ūıymdastyryldy. Sonymen qatar Jūmysshy mamandyqtary jyly ayasynda 108 adam qatysqan auqymdy sayahat Sharyn shatqaly baǵyty boıynsha ótkízíldí. Mūndaı tájírıbe studentterdíń tuǵan elíníń tabıǵı baılyǵyn óz kózímen kóríp, bolashaqta turısterge tanystyruyna múmkíndík beredí.
Būl tásíl óz nátıjesín berude. MITU kolledjíníń studentterí Ayusaı shatqaly ekologıyalyq soqpaqtaryn zerttep, Qazaqstan Respublıkasynyń Ortalyq memlekettík muzeıí men Ábílhan Qasteev atyndaǵy Qazaqstan Respublıkasynyń Memlekettík óner muzeıí ekspozıtsıyalarymen tanysuda. Bolashaqta olar turıstík toptardy kásíbı deńgeıde súıemeldeı alatyn mamandar retínde qalyptasady.
Osylaısha, qazírgí bílím beru ūıymdarynyń negízgí maqsaty – tek teorıyalyq bílím berumen shektelmeı, tájírıbege beıím, turızm salasynyń damuyna naqty úles qosa alatyn kásíbı mamandardy dayarlau. Būl – elímízdíń sapaly turıstík óním qalyptastyryp, halyqaralyq turıstík naryqtaǵy básekege qabílettílígín arttyruǵa baǵyttalǵan mańyzdy qadam.