Almatyda erekshe qajettílígí bar adamdar úshín ınfraqūrylymnyń qoljetímdílígín arttyru jáne ınklyuzıvtí turıstík ortany damytu maqsatynda qalanyń kóríktí oryndarynyń bes taktıldí úlgísín daıyndau jūmystary ayaqtaldy.
Taktıldí úlgíler kelesí nysandar úshín jasaldy: Voznesensk shírkeuí, Yqylas atyndaǵy halyq muzykalyq aspaptar muzeıí, Abaı atyndaǵy Qazaq ūlttyq opera jáne balet teatry, Almaty muzeıí jáne Qazaqstan Respublıkasynyń Ūlttyq ǵylym akademıyasy.
Joba ınklyuzıvtí ortaǵa beıímdelgen shaǵyn sáulet nysandary tūjyrymdamasy ayasynda júzege asyryldy. Qolmen sezíp tanuǵa arnalǵan úlgíler kóru qabíletí būzylǵan turısterge jáne ózge de erekshe qajettílígí bar adamdarǵa qalanyń kóríktí oryndarynyń syrtqy beınesín sezínu arqyly qabyldauǵa múmkíndík beredí. Sonymen qatar konstruktsıyalar qalanyń mádenı mūrasyna ūqypty qarau qaǵıdattaryn eskere otyryp jobalanǵan.
Shaǵyn sáulet nysandarynyń úsheuí ǵımarattardyń kíreberís aımaqtarynda, al ekeuí ǵımarattardyń íshíne ornalastyryldy. Qūrylymdar nysandardyń sáulettík stılíne saı bezendírílgen ústelshe formatynda jasalǵan. Betkí bólígínde zamanauı 3D-basyp shyǵaru tehnologıyalary qoldanylyp daıyndalǵan kólemdí 3D-model ornalastyrylǵan. Barlyq element antıvandaldyq sıpatqa ıe jáne ártúrlí klımattyq jaǵdaıda paıdalanuǵa beıímdelgen.
Sezínuge arnalǵan úlgíler ūzaq merzímdí paıdalanuǵa eseptelgen jáne olar erekshe qajettílígí bar kelushílerge barynsha ūzaq qyzmet etuí úshín qala tūrǵyndary men qonaqtarynyń ūqypty qarauyn talap etedí.
Jobany íske asyru Almatyda qoljetímdí turıstík ortany qalyptastyruǵa, qala tūrǵyndary men qonaqtary úshín jaılylyq deńgeıín arttyruǵa, sondaı-aq ınklyuzıvtí turızmdí damytuǵa baǵyttalǵan.
Būǵan deıín Mastercard kompanıyasynyń derekteríne sáıkes, sheteldík turıster qaladaǵy ártúrlí orynǵa joǵary qyzyǵushylyq tanytyp otyrǵany habarlanǵan bolatyn. Tanymal nysandar qatarynda Kóktóbe, Voznesensk shírkeuí, Ortalyq memlekettík muzeı, Kók bazar jáne Yqylas atyndaǵy halyq muzykalyq aspaptar muzeıí bar.
Qolmen sezíp tanuǵa arnalǵan úlgíler erekshe qajettílígí bar kelushílerge atalǵan nysandarmen tereńírek tanysuǵa múmkíndík beredí. Būl mádenı jáne tanymdyq turızmníń ayasyn keńeıtíp, qalanyń tarıhı-mádenı mūrasyna qūrmetpen qarau mádenıetín qalyptastyruǵa yqpal etedí.