Almaty ákímí Darhan Satybaldy míndettí áleumettík medıtsınalyq saqtandyru júıesímen halyqty qamtu jónínde keńes ótkízdí.
Keńes barysynda Almaty qalasynyń Qoǵamdyq densaulyq basqarmasy MÁMS júıesímen halyqty qamtudyń qazírgí jaǵdaıy, atqarylyp jatqan sharalardyń nátıjesí, sondaı-aq, 2026 jyly 1 qańtardan bastap kúshíne engen míndettí áleumettík medıtsınalyq saqtandyru salasyndaǵy zańnamalyq ózgeríster jónínde aqparat ūsyndy. Atap aıtqanda, jūmys ístemeıtín, áleumettík osal sanattaǵy azamattar úshín jarnanyń jergílíktí byudjet esebínen tólenu tártíbí qaraldy.
Medıtsınalyq saqtandyrumen qamtylmaǵan tūrǵyndar úlesín azaıtu jáne Tírkelgen halyq regıstríndegí derekterdíń dūrystyǵyn qamtamasyz etu - jūmystyń basty baǵyttarynyń bírí. Osyǵan baılanysty qalada derekter bazasyn jańartu, sáıkessízdíkterdí anyqtau jáne qaıtalanatyn ne eskírgen aqparatty joyu boıynsha júıelí jūmys júrgízílíp jatyr.
Almatyda «qala – audan – emhana» jelísí boıynsha vedomstvoaralyq ózara ís-qımyldyń bíryńǵaı algorıtmí qūrylǵan. Būl MÁMS júıesíne enbegen azamattarǵa jedel túrde qoldau kórsetuge múmkíndík beredí. Jūmys naqty mekenjaı boıynsha júrgízíledí: tūrǵyndarǵa qońyrau shalu, úılerdí aralau, halyq kóp jınalatyn oryndarda aqparattyq aktsıyalar ótkízu, sondaı-aq azamattar medıtsınalyq-sanıtarlyq alǵashqy kómek ūıymdaryna júgíngen kezde olardyń MÁMS mártebesín tūraqty tekseru sharalary qolǵa alynǵan.
Ásírese, vedomstvoaralyq úılestíru men halyqpen aqparattyq-túsíndíru jūmysyna erekshe mán berílíp otyr. Būl jūmys míndettí áleumettík medıtsınalyq saqtandyru júıesíníń tetíkterí, saqtandyrylǵan azamattardyń qūqyǵy men míndetí, jarna tóleu tártíbí turaly habardarlyqty arttyruǵa baǵyttalǵan.
Keńes qorytyndysy boıynsha Darhan Satybaldy tūrǵyndardy MÁMS júıesíne tartu boıynsha júıelí árí naqty jūmys júrgízudí, memlekettík aqparattyq bazalardy uaqytyly jańartyp otyrudy, úderísterdí basqaru sapasy úshín medıtsınalyq ūıymdar men salalyq basqarmalardyń jauapkershílígín kúsheıtudí tapsyrdy.
Sondaı-aq, Almaty ákímí áleumettík osal sanattaǵy azamattar úshín byudjet qarajaty esebínen tólenetín jarnalardyń ashyq árí tıímdí paıdalanyluynyń mańyzyn atady.