Almaty qalasynyń týberkýlezge qarsy qyzmetiniń 2025 jyly 12 aıdaǵy jumysynyń qorytyndysy boıynsha barlyq negizgi kórsetkishi oryndaldy. Bul týraly Almaty qalasy Qoǵamdyq densaýlyq saqtaý basqarmasynyń shtattan tys bas ftızıatry Janar Sapıeva QDSB basshysy Marat Pashımovtyń jáne qalanyń medısınalyq uıymdary ókilderiniń qatysqan kezekti jumys keńesinde málimdedi.
Almatyda týberkýlezben aýrýshańdyq pen odan bolatyn ólim-jitimdi tómendetý boıynsha turaqty oń dınamıka tirkeldi. Aýrýshańdyq 15,9%-ǵa tómendep, 100 myń turǵynǵa shaqqanda 18,0 jaǵdaı boldy, al 2024 jyldyń osy kezeńinde bul kórsetkish 21,5 bolǵan.
Balalar arasynda da oń ózgerister baıqalady.
Balalardaǵy týberkýlezben aýrýshańdyq 2,2%-ǵa tómendep, 100 myń balaǵa shaqqanda 4,4 kórsetkish boldy
Týberkýlezdi emdeýdiń tıimdiligi joǵary deńgeıde saqtalyp otyr, bul kórsetiletin medısınalyq kómektiń sapasyn jáne pasıentterdiń emge degen joǵary beıildiligin aıǵaqtaıdy.
Emge beıildilikti arttyrý maqsatynda ambýlatorıalyq kezeńde pasıentterge jergilikti búdjet qarajaty esebinen aı saıyn 12 aılyq eseptik kórsetkish (AEK) mólsherinde áleýmettik qoldaý kórsetiledi. Sonymen qatar, qalada jyl saıyn «Týberkýlez» granty boıynsha memlekettik áleýmettik tapsyrys iske asyrylyp, onyń aıasynda úkimettik emes uıymdar áleýmettik osal toptaǵy adamdarǵa kómek kórsetedi.
Turaqty nátıjege qol jetkizýde Almaty qalasy QDSB-nyń Ftızıopýlmonologıa ortalyǵynyń monıtorıń jáne baǵalaý bólimi mańyzdy ról atqarady. 2025 jyly 155 monıtorıń jáne 42 qashyqtan monıtorıń júrgizildi.
Sonymen qatar, medısınalyq mamandardyń biliktiligin arttyrý baǵytynda júıeli jumys júrgizilip keledi. 2025 jyly 12 aıda qalanyń medısınalyq uıymdarynda jumys isteıtin 835 medısına qyzmetkeri, onyń ishinde dárigerler men orta býyn medısına qyzmetkerleri oqytýdan ótti.
Keshendi tásil, kúsheıtilgen baqylaý jáne pasıentterge kórsetiletin áleýmettik qoldaý Almaty qalasyna týberkýlezben kúreste mańyzdy nátıjelerge qol jetkizýge jáne negizgi epıdemıologıalyq kórsetkishterdiń turaqty tómendeýin jalǵastyrýǵa múmkindik berdi.
Sondaı-aq, kezdesý barysynda akýsherlik-gınekologıalyq jáne pedıatrıalyq kómektiń sapasyn monıtorıńteý jáne baǵalaý nátıjesi, sonymen birge Almaty qalasynyń BMSK jastar densaýlyq ortalyqtarynyń qyzmeti týraly esep tyńdaldy.
Qatysýshylar saqtandyrylmaǵan azamattar men nozologıalar boıynsha medısınalyq uıymdar keskinindegi jaǵdaıdy taldaýǵa erekshe nazar aýdardy.
Budan bólek, Almaty qalasyndaǵy memlekettik emhanalardyń call-ortalyqtarynyń jumysy, onyń ishinde qońyraý shalý qoljetimdiligi, keńes berý sapasy jáne turǵyndardyń ótinishine jedel jaýap berý jaıy qaraldy.