Elímízde klınıkalyq daǵdylardy damytu jáne júrektíń qūrylymdyq aurularyn emdeudíń ozyq tehnologıyalaryn engízu sheńberínde Kardıologıya jáne íshkí aurular ǵylymı-zertteu ınstıtutynyń ınterventsıyalyq kardıologtary halyqaralyq sarapshy Dr.İsmail Ates, MD - Associate Professor of Cardiology Bahcesehir University qatysuymen mıtraldyq jetíspeushílíktí emdeudíń zamanauı ádísterí boıynsha bíregeı operatsıya jasady, – dep habarlaıdy aqshamnews.kz tílshísí.
Ís-shara barysynda ınstıtuttyń medıtsınalyq komandasy zamanauı Dragonfly júıesín paıdalana otyryp, TEER («shetínen shetíne deıín» mıtraldy qaqpaqshany transkateterlík qalpyna keltíru) ádístemesí boıynsha 4 joǵary tehnologıyalyq operatsıyany sáttí ótkízdí.
27 jastaǵy patsıenttí qalypty dene júktemesí kezínde (2-qabatqa kóterílgende), júrek soǵuynyń jıílígí, bas aınalu, jalpy álsízdík mazalaǵan. Oǵan júre paıda bolǵan júrek qyzmetíníń kemístígí, 3 st. mıtraldy jetíspeushílík, trıkuspıdaldy qaqpaqshanyń jetíspeushílígí, dılatatsıyalyq kardıomıopatıya dıagnozy qoıyldy. Aıqyn mıtraldyq regurgıtatsıyany, sol qarynshanyń tómen fraktsıyasyn (nebárí 27%) jáne ashyq hırurgıyalyq aralasudyń joǵary qaupín eskere otyryp, klınıka dárígerleríníń konsılıumy mıtraldyq qaqpaqshany endovaskulyarlyq klıpteu operatsıyasyn júrgízu turaly sheshím qabyldady.
TEER ádísí auyr mıtraldy regurgıtatsıyanyń auyr túrí bar patsıentterde qoldanylady, būl jaǵdaıda mıtraldy qaqpaqsha japyraqshalary dūrys jabylmaı, qannyń kerí aǵysyna ákeledí.
65 jastan asqan adamdardyń 10%-dan astamy mıtraldy jetíspeushílíktíń ortasha nemese auyr túrínen zardap shegedí jáne kóptegen patsıent úshín operatsıya qaupí joǵary boluynan hırurgıyalyq emdeu múmkín emes. Mūndaı jaǵdaılarda transkateterlík tehnologıyalar emdeudíń jalǵyz tıímdí nūsqasyna aınalady. Protsedura az ınvazıvtí tásílmen oryndalady jáne aralasudyń joǵary dáldígí men qauípsízdígín qamtamasyz etetín 3D-vızualızatsıya men óńesh arqyly jasalatyn ehokardıografıyanyń baqylauymen júrgízíledí.
«Mūndaı bílím beru klınıkalyq ís-sharalary praktıkalyq daǵdylardy jetíldíruge, klınıkalyq tájírıbe almasuǵa, jańa tehnologıyalardy engízuge jáne kómek sapasyn arttyruǵa baǵyttalǵan. Olar teorıyanyń praktıkamen baılanysyn qamtamasyz etíp, dárígerlerge kásíbı qūzyrettílígín arttyruǵa múmkíndík beredí», - deıdí ınstıtuttyń Basqarma tóraǵasy Rústem Tóleutaev.
Rentgenendovaskulyarlyq operbloktyń meńgerushísí Alekseı Kolesnıkovtyń aıtuynsha, mūndaı operatsıyalardan keıín patsıentter tez sauyǵyp, bírneshe kúnnen keıín úıleríne shyǵarylady. Olarda ómír súru sapasy edáuír jaqsarady, demígu azayady, dene júktemesíne tózímdílík artady, medıtsınalyq kómekke júgínu jıílígí tómendeıdí.
Ota jasalǵan nauqastardyń tórteuíníń de jaǵdaıy qazír jaqsy deıdí dárígerler.