Almatyda suyq sumen jabdyqtau jáne káríz qyzmetín tūtynushylardy keshendí tekserudíń belsendí kezeńí bastaldy. Būl turaly qalalyq Energetıka jáne sumen jabdyqtau basqarmasynyń mamandary aıtty, – dep habarlaıdy aqshamnews.kz tílshísí.
«Almaty Su» MKK mamandarynyń málímetínshe, būl jūmystar sudy paıdalanu salasynda tártíp ornatuǵa, resurstardy esepke aludyń ashyqtyǵyn arttyruǵa jáne su shyǵynyn azaıtuǵa baǵyttalǵan auqymdy túgendeu ayasynda júrgízílíp jatyr.
Ís-sharalar barysynda abonentterdíń su jáne káríz qyzmetterín paıdalanu qaǵıdalaryn saqtau deńgeıí nazarǵa alynady. Zańsyz qosylu, esepteu qūraldarynyń jūmysyna aralasu jáne tūtynu kólemín ádeıí tómendetu faktílerín anyqtauǵa basymdyq berílíp otyr.
Sonymen qatar mamandar ınjenerlík jelílerdíń tehnıkalyq jaı-kúıín de baǵalap jatyr.
Túgendeu jūmystary qalanyń barlyq audanyn qamtıdy. Tıímdílíktí arttyru úshín aumaqtar jeke sektorlarǵa bólíníp, sol jerlerde mobıldí toptar jūmys ísteıdí.
«Almaty Su» ókílderíníń aıtuynsha, írí su tūtynushylar erekshe baqylauǵa alynǵan. Olardyń qatarynda monshalar, kólík juu beketterí, qoǵamdyq tamaqtanu oryndary, sauda ortalyqtary, ónerkásíp kásíporyndary bar. Būl nysandar úshín sudy qaıta paıdalanu júıelerí men jergílíktí tazartu qūrylystarynyń boluy míndettí talap retínde qarastyrylǵan.
Anyqtalǵan barlyq zańbūzushylyq boıynsha qoldanystaǵy zańnamaǵa sáıkes sharalar qabyldanady. Olar tūtynu kólemín qaıta esepteuden bastap, qyzmet kórsetudí shekteu nemese tolyq toqtatuǵa deıíngí tetíkterdí qamtıdy.
Reıdtík ís-sharalardyń alǵashqy aptalarynda-aq júzden astam zańbūzushylyq anyqtaldy. Eń jıí kezdesken derekter:
• kelísímshartsyz sudy paıdalanu;
• esepteu qūraldarynyń jūmysyna aralasu;
• tazartylmaǵan aǵyn sulardy tógu;
• qoǵamdyq tamaqtanu oryndarynda maı ūstaǵyshtardyń bolmauy.
2026 jyldyń bírínshí toqsanynda 29 kólík juu beketí alǵash ret sudy qaıta paıdalanu júıelerín ornatty. Būǵan qosa, būryn tūrmystyq tarıfpen tólem jasap kelgen 78 nysan kommertsıyalyq tarıfke auystyryldy. Sondaı-aq, ınjenerlík jelílerge óz betínshe qosyludyń 20-dan astam deregí anyqtaldy.