Almatynyń Energetıka jáne sumen jabdyqtau basqarmasy Stroıtelnaya kóshesíníń bír bólígínde qūrylys-montaj jūmystarynyń júrgízíluíne baılanysty kólík qozǵalysyna uaqytsha shekteu engízíletínín habarlady, – dep habarlaıdy aqshamnews.kz tílshísí.
Atalǵan jūmystar «Almaty qalasynda Batys káríz kollektoryn salu» ınfraqūrylymdyq jobasy ayasynda júzege asyrylyp jatyr. Merdíger ūıym — «Pavlodar ózen porty» AQ.
Qūrylys-montaj jūmystary 2026 jyly 30 nauryz ben 10 mausym aralyǵynda Stroıtelnaya kóshesínde, sondaı-aq Nauryzbaı audanyndaǵy Abaı dańǵyly men Stroıtelnaya kóshesíníń (dubler) qıylysynda júrgízíledí.
Osyǵan baılanysty atalǵan uchaskelerde avtokólík qozǵalysyna uaqytsha shekteuler kezeń-kezeńímen engízíledí. Kóshení tolyq jabu qarastyrylmaǵan. Būl kólík qozǵalysyndaǵy qolaısyzdyqty barynsha azaıtyp, kólík qozǵalysynyń qoljetímdílígín saqtauǵa múmkíndík beredí.
Atalǵan shekteuler írí ınfraqūrylymdyq jobany íske asyruǵa baılanysty engízílíp otyr. Ūzyndyǵy 34,9 shaqyrymdy qūraıtyn Batys káríz kollektory Nauryzbaı jáne Alatau audandaryndaǵy 175 myńnan astam tūrǵyndy, sondaı-aq Almaty oblysynyń Qarasaı jáne Íle audandaryndaǵy shamamen 20 myń adamdy ortalyqtandyrylǵan su būru júıesímen qamtamasyz etedí.
Qala tūrǵyndary men qonaqtarynan uaqytsha qolaısyzdyqqa túsínístíkpen qarap, baǵyttaryn aldyn ala josparlau kezínde engízílgen ózgerísterdí eskerudí sūraıdy.
Qozǵalysqa qatysty aqparatty @AlmatyJoly Telegram arnasynan, ákímdíktíń áleumettík jelídegí resmı paraqshalarynan, sondaı-aq 2GIS pen «Yandeks Kartalar» servısterínen bíluge bolady.