Almatyda «Shyǵys qaqpasy» polıortalyǵyn damytu ayasynda qalanyń soltústík-shyǵys bólígínde jańa joldar men ınjenerlík kommunıkatsıyalar salu josparlanǵan, – dep habarlaıdy aqshamnews.kz tílshísí.
Joba 2023 jyly bekítílgen Almaty qalasynyń Bas josparyna sáıkes júzege asyryluda. Qazírgí uaqytta Bas josparǵa engízílíp jatqan túzetuler būl jobaǵa qatysty qandaı da bír ózgerísterdí kózdemeıdí.
Aumaqtardyń kólík baılanysyn jaqsartu maqsatynda Baımaǵambetov kóshesí, Qūlja tas joly, Būqtyrma kóshesí jáne Rysqūlov dańǵyly shekteıtín aumaqta jalpy ūzyndyǵy 17,5 shaqyrym bolatyn jańa joldar salu josparlanyp otyr.
Būqtyrma kóshesí men Rysqūlov dańǵylyn jalǵaıtyn jańa magıstral alty jolaqty bolady. Onyń ení – 50 metr, ūzyndyǵy – 4,6 shaqyrym. Būl joldy salu Úlken Almaty aınalma avtomobıl jolymen (ÚAAAJ) kólík baılanysyn qamtamasyz etuge múmkíndík beredí. Nátıjesínde kólík qoljetímdílígí artyp, qalanyń kóshe-jol jelísíníń ózara baılanysy jaqsarady, sondaı-aq Almaty men aglomeratsıyadaǵy eldí mekender arasyndaǵy kólík qatynasynyń tıímdílígí kúsheıedí.
Josparlanǵan magıstral jeke tūrǵyn úı sektory arqyly ótetíndíkten, memlekettík qajettílík úshín shamamen 200 jer uchaskesín májbúrlep satyp alu kózdelgen. Osyǵan baılanysty qala ákímdígí tıístí qauly qabyldap, jyljymaıtyn múlík ıeleríne habarlama joldandy.
Qala ákímdígíníń málímetínshe, polıortalyqtar júıesín damytu Almatynyń negízgí damu basymdyqtarynyń bírí bolyp qala beredí. Jańa polıortalyqtarda qoǵamdyq-ískerlík jáne tūrǵyn úı klasterlerín qalyptastyru, kólík-logıstıkalyq toraptardy damytu, qoǵamdyq keńístíkter men áleumettík nysandar salu kózdelgen.
Sonymen qatar qalanyń aumaqtyq damu múmkíndígíníń shekteulí ekenín eskere otyryp, megapolıstí damytudyń basym baǵyty retínde jeke tūrǵyn úı sektoryn kezeń-kezeńímen qaıta jańǵyrtu jáne damytu qarastyrylǵan. Būl álemníń írí qalalarynda qalyptasqan tájírıbege tolyq sáıkes keledí.