Almatyda «Kítap oqıtyn ūlt» jalpyūlttyq marafony ayasynda ūıymdastyrylǵan jastar arasyndaǵy kítap oqu chempıonaty qorytyndylandy, – dep habarlaıdy aqshamnews.kz tílshísí.
Jobaǵa 200-den astam adam qatysyp, áleumettík jelílerde ádebı shyǵarmalarǵa arnalǵan 100-den astam beıneretsenzıya jarıyalandy. Úzdík dep tanylǵan alty qatysushy aqshalaı syılyqtarǵa ıe boldy. Būl turaly Almaty qalasy Jastar sayasaty basqarmasynyń ókílderí habarlady.
Marapattau rásímí Respublıka kúní qarsańynda Satbayev University qabyrǵasynda óttí. Baıqaudy qalalyq Jastar sayasaty basqarmasynyń qoldauymen Skill All jobalyq keńsesí ūıymdastyrdy.
Qatysushylarǵa tórt kítaptyń bírín oqyp shyǵu ūsynyldy. Olar: Saıyn Mūratbekovtíń «Jusan ıísí», Oljas Súleımenovtíń «AZ ı Ya», Marı Faveronyń «Altyn Orda. Dala ımperıyasy álemdí qalaı ózgerttí» nemese Arman Álmenbettíń «Tergeushí» shyǵarmalary.
Baıqau sharty boıynsha qatysushylar ūzaqtyǵy bír mınuttan úsh mınutqa deıíngí beıneretsenzıya daıyndauǵa tıís. Jastardan shyǵarmanyń mazmūnyn jaı bayandau emes, ony taldau, avtordyń negízgí oıyn túsíndíru jáne tūjyrymyn bólísu talap etíldí.
Qazylar alqasy jūmystardy baǵalau kezínde shyǵarmanyń mazmūnyn túsínu deńgeıíne, dáleldíń negízdílígíne, oı-píkírdíń derbestígíne, bayandaudyń qısyndylyǵy men anyqtyǵyna nazar audardy. Beınetúsírílím sapasy negízgí baǵalau ólshemí bolǵan joq.
Chempıonat qorytyndysy boıynsha alty júldeger anyqtaldy. Marapattau rásímínde Almaty qalasy Jastar sayasaty basqarmasy basshysynyń orynbasary Mıras Nysanálıev kítap oqudy nasıhattau Qazaqstan Prezıdentí Qasym-Jomart Toqaev aıqyndaǵan míndetterdíń bírí ekenín jetkízdí. Onyń aıtuynsha, mūndaı jobalar bílímge, jauapkershílík jáne derbes oılau qaǵıdattaryna negízdelgen «Adal azamat» tūjyrymdamasynyń ūstanymdarymen de úndesedí.
«Kítap oqıtyn ūrpaq – oıly ūrpaq. Al oıly ūrpaq – el bolashaǵyn qalyptastyratyn basty kúsh. Búgín qatysushylar aqparatty jaı ǵana qabyldap qoımaı, ony taldaı alatynyn, píkír bíldíríp, ūstanymyn dáleldeı bíletínín kórsettí. Dál osyndaı jastar Qazaqstannyń zıyatkerlík damuynyń negízíne aınalady», – dedí Mıras Nysanálıev.
Sondaı-aq ol mūndaı bastamalardyń mańyzyna toqtalyp, el tarıhyn bíludíń, ana tílíne qūrmetpen qaraudyń jáne bílímge ūmtyludyń erekshe mánge ıe ekenín aıtty.
769 myńnan astam jas tūratyn jáne 36 joǵary oqu orny jūmys ísteıtín Almatyda bílím beru jobalaryn qoldau jastar sayasatynyń mańyzdy baǵyttarynyń bírí bolyp qala beredí. Qala ákímí Darhan Satybaldy aıqyndaǵan basymdyqtardyń qatarynda bílím beru sapasyn arttyru jáne jas ūrpaqtyń qabíletín ashuǵa qolaıly jaǵdaı jasau míndetterí bar.
Marapattau rásímíne Satbayev University, bílím beru ūıymdarynyń, qoǵamdyq bírlestíkter men jastar ūıymdarynyń ókílderí qatysty.
Ūıymdastyrushylar aldaǵy uaqytta da kítap oqudy nasıhattauǵa baǵyttalǵan ís-sharalardy jalǵastyrudy josparlap otyr. Olardyń píkírínshe, beıneretsenzıya formaty qatysushylardyń ádebı shyǵarmalardy qanshalyqty túsíngenín baǵalauǵa ǵana emes, sonymen qatar kózqarasyn kópshílík aldynda bíldíríp, ony dáleldeuge múmkíndík beredí.