10 mamyr kúní Almatyda ótken “Asia Rugby Emirates Women’s Championship” halyqaralyq turnırí máresíne jettí. Baıraqty báseke nátıjesínde Qazaqstan áıelder qūramasy regbıden Azıya chempıonatynyń kúmís medalín jeńíp aldy, – dep habarlaıdy aqshamnews.kz tílshísí.
Turnırdíń sońǵy matchynda qazaqstandyq sportshylar Gonkong qūramasymen kezdesíp, tartysty oıynda 26:26 esebímen teń tústí.
Kúmís júldeníń taǵdyry Japonıya qūramasyna qarsy ótken oıyndardaǵy ūpaı aıyrmasyna baılanysty sheshíldí. Qazaqstan qūramasy būl kórsetkísh boıynsha qarsylastarynan sál ǵana basym túsíp, qajettí nátıjení saqtap qala aldy.
Nóser jauyn men qolaısyz aua raıyna qaramastan, ūlttyq qūrama oıyn barysynda joǵary daıyndyq pen tabandylyq tanytyp, qūrlyqtaǵy myqty komandalardyń bírí ekenín dáleldedí.
Aıta keteıík, Qazaqstan qūramasynyń sapyndaǵy 26 sportshynyń 16-sy Almaty qalasynyń ókílderí.
Almaty qalasy Sport basqarmasy ókílderíníń málímetínshe, būl jetístík komanda íshíndegí auyzbírshílík pen sportshylar jáne jattyqtyrushylar shtabynyń qajyrly eńbegíníń nátıjesí.
Turnır qorytyndysynda Japonıya qūramasy chempıon atansa, Qazaqstanǵa ekínshí oryn būıyrdy. Al Gonkong qūramasy úzdík úshtíktí túıíndedí.
Óz alańynda ótken Azıya chempıonatyndaǵy kúmís júlde qazaqstandyq áıelder regbıí úshín mańyzdy tarıhı nátıje sanalyp, ūlttyq qūramanyń halyqaralyq deńgeıdegí áleuetín taǵy bír márte kórsettí.