Almatyda qoǵamdyq kólík júıesí men jol qozǵalysy jańǵyrtylyp keledí, – dep habarlaıdy aqshamnews.kz tílshísí.
Almatyda qoǵamdyq kólíktí damytu, jol ınfraqūrylymyn jańǵyrtu jáne jol qozǵalysy qauípsízdígín arttyru baǵytyndaǵy keshendí sharalar jalǵasyp jatyr. Būl máseleler Almaty ákímí Darhan Satybaldynyń tóraǵalyǵymen ótken keńeste qaraldy.
Qoǵamdyq kólík júıesín damytu ayasynda 2026 jyly №96, №130 jáne №145 jańa baǵyttary íske qosyldy. Sonymen qatar, jolaqy tóleudíń Avtobys elektrondy júıesín kezeń-kezeńímen jańǵyrtu bastaldy. Jańartylǵan júıe qolma-qol aqshasyz tólemníń barlyq túrín qoldaıdy. Būl rette júıe «Onaı» qyzmetímen qatar jūmysyn jalǵastyra beredí.
Qoǵamdyq kólíkke arnalǵan arnaıy jolaqtardy keńeıtu jūmystary da jalǵasuda. Qazírgí tańda buslane jolaqtarynyń jalpy ūzyndyǵy 84 shaqyrym. Qosymsha taǵy 56 shaqyrym arnaıy jolaq ūıymdastyru josparlanǵan. Sonyń nátıjesínde arnaıy jolaqtardyń jalpy ūzyndyǵy 140 shaqyrymǵa jetpek.
Qalada jol qozǵalysyn ońtaılandyru sharalary da júzege asyrylyp jatyr. Pılottyq rejımde Jukov, Uálıhanov jáne Manaev kóshelerínde bírjaqty qozǵalys engízíldí. Bıyl mausym-shílde aılarynda osyǵan ūqsas sheshímderdí qalanyń basqa da kóshelerínde engízu josparlanyp otyr.
Velosıped ınfraqūrylymyn damytuǵa erekshe nazar audarylǵan. Qazírgí uaqytta velojoldardyń ūzyndyǵy 89 shaqyrym. Qosymsha taǵy 38,5 shaqyrym jańa velojol salu kózdelgen.
Sonymen qatar, jol belgílerí men jol tańbalaryn jańartu jūmystary jalǵasuda. Qalada 3842 jol belgísí qalpyna keltírílíp, auystyrylyp nemese jańadan ornatyldy. Al jol tańbalary kóshe-jol jelísíníń 1700 shaqyrym aumaǵynda syzyldy.
Būdan bólek, jol qozǵalysyn avtomattandyrylǵan basqaru júıesín jańǵyrtu jūmystary júrgízílíp jatyr. Almatyda 642 baǵdarsham nysany bar, olardyń bír bólígí avtomattandyrylǵan júıege qosylǵan. Joba ayasynda baǵdarshamdardy odan árí jańǵyrtu jáne ıntellektualdy kólík júıesín engízu josparlanǵan.
Ayaldama ınfraqūrylymyn damytu jūmystary da jalǵasuda. Qalada 2261 ayaldama punktí bar bolsa, olardyń 2089-y arnaıy pavılondarmen jabdyqtalǵan. 2026 jyldyń sońyna deıín qoǵamdyq kólík ayaldamalaryna LED-tablolar ornatu josparlanyp otyr.
Sonymen qatar, kıksherıng qyzmetteríníń jūmysyn retteu baǵytynda da sharalar qabyldanuda. Elektrosamokattar úshín qalalyq orta erekshelíkteríne qaraı jańa jyldamdyq rejımderí engízílíp, mıkromobıldí kólík qūraldaryn paıdalanu talaptary kúsheıtílude.
Jol qozǵalysyn ūıymdastyru jáne jolaushylar kólígí basqarmasy ókílderíníń málímetínshe, qolǵa alynǵan sharalar jol qozǵalysy qauípsízdígín arttyruǵa, tūraqty qalalyq mobıldílíktí damytuǵa jáne Almaty tūrǵyndary men qonaqtary úshín jaıly kólík ortasyn qalyptastyruǵa baǵyttalǵan.