96 almatylyq bír kúnde AITV-ǵa jedel test tapsyrdy, – dep habarlaıdy aqshamnews.kz tílshísí.
Almatydaǵy Arbat alańynda «Densaulyǵym – óz qolymda. Meníń tańdauym – qauípsíz ómír» atty auqymdy aktsıya óttí. Ís-sharany Almaty qalalyq JITS-tíń aldyn alu jáne oǵan qarsy kúres ortalyǵy Adam reproduktsıyasy qalalyq ortalyǵymen bírlesíp ūıymdastyrdy. Būl turaly qalalyq Qoǵamdyq densaulyq saqtau basqarmasynyń ókílderí habarlady.
Ís-shara ayasynda medıtsına mamandary, jastar, qala tūrǵyndary men qonaqtary AITV ınfektsıyasynyń, jynystyq jolmen beríletín ınfektsıyalardyń aldyn alu, sondaı-aq reproduktıvtík jáne psıhoemotsıonaldyq densaulyqty saqtau máselesí tóńíregínde bas qosty.
Almaty qalalyq JITS-tíń aldyn alu jáne oǵan qarsy kúres ortalyǵynyń dırektory Marat Túkeevtíń aıtuynsha, aktsıyanyń basty maqsaty – tūrǵyndardyń densaulyǵyna jauapkershílíkpen qarauynyń jáne uaqytyly tekseruden ótudíń mańyzdylyǵy jóníndegí aqparattylyq deńgeıín arttyru.
Aktsıya barysynda AITV-nyń aldyn alu jáne ınfektsıyany erte anyqtau máselesíne erekshe nazar audaryldy. Qalaǵan árbír adam AITV-ǵa tegín, qūpıya túrde jáne qajet bolǵan jaǵdaıda jasyryn túrde jedel test tapsyra aldy. Aktsıya kezínde 96 adam testíleuden ótíp, nátıjesín nebárí 20 mınut íshínde aldy.
Mamandardyń aıtuynsha, almatylyqtardyń testíleuge degen qyzyǵushylyǵy jyldan-jylǵa artyp keledí. Jyl saıyn qala tūrǵyndarynyń 20 paıyzdan astamy ózíníń AITV mártebesín anyqtaıdy. JITS ortalyǵynyń medıtsına qyzmetkerlerí AITV-nyń aldyn alu jóníndegí aqparatty keńínen nasıhattau maqsatynda tūraqty túrde kóshpelí aktsıyalar ótkízíp, oqu oryndary men ūıymdardy aralap tūrady.
Aktsıya ayasyndaǵy aqparattyq alańdar negízínen jastar audıtorıyasyna baǵyttaldy. Qatysushylar balalar gınekologynan, urolog jáne epıdemıologtan tegín keńes aldy.
Adam reproduktsıyasy qalalyq ortalyǵynyń dırektory Gauhar Kóshkímbaevanyń aıtuynsha, dárígerler jynystyq jolmen beríletín ınfektsıyalardyń aldyn aludyń zamanauı tásílderí, tūraqty medıtsınalyq tekserulerden ótudíń jáne aurulardy erte anyqtaudyń mańyzdylyǵy, sondaı-aq jasóspírím kezden bastap densaulyqqa qarau mádenıetín qalyptastyru turaly túsíndírdí.
Qonaqtar úshín vıktorınalar, taqyryptyq saualnamalar jáne aqparattyq materıaldar taratylatyn ınteraktıvtí aımaqtar ūıymdastyryldy. Qatysushylar salauatty ómír salty, AITV-nyń aldyn alu jáne psıhoemotsıonaldyq densaulyqty saqtau máselelerín belsendí talqylady.
Mamandardyń píkírínshe, halyqty ashyq aqparattandyru jáne testíleudíń qoljetímdí boluy - AITV ınfektsıyasynyń aldyn aludaǵy eń tıímdí qūraldardyń bírí. Osyndaı aktsıyalardy qoǵamdyq oryndarda ótkízu medıtsınalyq kómek pen keńestí tūrǵyndarǵa barynsha qoljetímdí etíp, qoǵamdyq densaulyqty nyǵaıtuǵa yqpal etedí.