Almatydaǵy MEGA Alma-Ata sauda oıyn-sauyq ortalyǵynyń Event Space alańynda 5 qyrkúıekte ekouıkend óttí, – dep habarlaıdy aqshamnews.kz tílshísí.
Oǵan qala tūrǵyndary men qonaqtarymen qosa, júzden astam adam qatysty. Ís-sharany ECO Network «Eco Almaty» JShS-níń aqparattyq qoldauymen ūıymdastyrdy.
Ekouıkendtíń negízgí maqsaty – ekologıyalyq ádet qalyptastyru, qaldyqtardy sūryptap jınau men qaıta óńdeudíń mańyzyn túsíndíru jáne jauapty tūtynu mádenıetín damytu. Qatysushylar úshín tanymdyq ís-sharalar, balalar men eresekterge arnalǵan sabaqtar, sondaı-aq ınteraktıvtí vıktorına ūıymdastyryldy.
Ís-shara barysynda qaldyqty qaıta óńdeu úderísí de kópshílík nazaryna ūsynyldy. Qonaqtarǵa qaldyqty sūryptaǵannan keıín materıaldyń qandaı joldan ótetíní kórsetíldí. Yaǵnı, ony jınau men fraktsıyaǵa bólu kezeńínen bastap qaıta óńdeuge jáne jańa óním jasauǵa deıíngí kezeńder kórsetíldí.
Ekologıyalyq sauattylyqty arttyruǵa da erekshe kóńíl bólíndí. Qatysushylar oıyn formatynda qorshaǵan ortaǵa qatysty bílímín tekseríp, kúndelíktí ádetterdíń ekologıyalyq jaǵdaıǵa qalaı áser etetínín bíldí.
Baǵdarlamanyń shyǵarmashylyq bólígínde Bedazzled sheberlík sabaǵy ūıymdastyrylyp, qatysushylar túrlí būıymdar jasady.
Ekouıkend praktıkalyq, tanymdyq jáne shyǵarmashylyq baǵyttardy bíríktíríp, qatysushylar qaldyqtardy bólek jınau arqyly olardy ekínshí shıkízat retínde qaıta aınalymǵa engízuge bolatynyn kórsettí.