Almatyda Pushkın kóshesí boıyndaǵy aumaqty auqymdy jańǵyrtu jūmystary jalǵasyp jatyr. Joba aumaǵy Raıymbek dańǵylynan Gogol kóshesíne deıíngí aralyqty qamtıdy. Būl keńístík seruendeuge, demaluǵa jáne qala ortalyǵynyń tynysyn sezínuge qolaıly, zamanauı qalalyq dálízge aınaluda. Mūnda jaı ǵana jańartylǵan trotuar emes, oılastyrylǵan jaryqtandyru júıesí, avtomatty suaru tetígí jáne kedergísíz orta qarastyrylǵan tolyqqandy jasyl kóshe qalyptasyp keledí. Mūny turaly Almaty qalasynyń Qoǵamdyq keńístíkterdí damytu basqarmasynyń mamandary aıtty.
Jobada kógaldandyruǵa erekshe mán berílgen. Kóshe boıyna shamamen 300 aǵash pen 8 myńǵa juyq būta otyrǵyzylǵan. Kógaldandyru kezínde Germanıyadaǵy tálímbaqtan ákelíngen Frıman úıeńkísí, tózímdí shegírshín, írí japyraqty pallıda, sondaı-aq Túrkıyadan jetkízílgen gınkgo bıloba paıdalanyldy. Gınkgo aǵashy Almatyda alǵash ret otyrǵyzylyp, qalalyq landshafttyń jańa árí aıshyqty elementíne aınalmaq. Jasyl qabatty kókjalbyz, aq sántal «Elegantıssıma», rugoza raushany, qyltanbas, japon tobylǵysy men kópírshík tolyqtyryp, jyl boıy túrlí reńk pen kórkemdík beredí.
Sonymen qatar jabyndar jańartylyp, jańa kóshe jaryǵy ornatyluda, tas tóseu jáne su būru júıesín jasau jūmysy qolǵa alynǵan. Qazírgí tańda eskírgen trotuarlar men trolleıbus jelílerí tolyǵymen alynyp, kabeldík jelílerdíń negízgí magıstraldary tartyldy, avtomatty suaru júıesíníń basym bólígí men jaryqtandyru tírekterí ornatyldy. Rezervuar qūrylysy ayaqtaluǵa jaqyn, júrgínshíler ınfraqūrylymyn qalyptastyru jáne kógaldandyru jūmystary jalǵasyp jatyr.
Jańartylyp jatqan aumaqtyń ūzyndyǵy — 1,1 shaqyrym, jalpy kólemí — 6,5 gektar. Nysannyń daıyndyq deńgeıí shamamen 80 paıyzǵa jettí. Barlyq jūmys ayaqtalǵan soń Pushkın kóshesí Almatynyń tarıhı ortalyǵyn jańa qyrynan tanytatyn, kóleńkesí men jasyl jelegí mol, tūrǵyndar men qala qonaqtaryna jaıly seruen baǵytyna aınalady. Kóríktendíru jūmystary belgílengen kestege saı jalǵasyp, zamanauı árí qolaıly qalalyq orta qalyptastyruǵa baǵyttalǵan.