Almatyda ashyq aspan astyndaǵy teatrdy, muzykany, áleumettík bastamalar men ekologıyalyq shyǵarmashylyqty bíríktírgen «Panfılovtaǵy Jańa jyl» qalalyq jańa jyldyq festıvalí óttí, dep habarlaıdy aqshamnews.kz
Bírneshe kúnge sozylǵan mereke qala tūrǵyndary men qonaqtary úshín jarqyn emotsıya men erekshe mádenı tájírıbege toly keńístíkke aınaldy.
Festıvaldíń basty oqıǵasy – Almaty qalasynyń erekshelíkterín eskere otyryp arnaıy daıyndalǵan úsh metrlík quyrshaqtar qatysqan «Alma men Ata» atty bíregeı kóshelík teatrlandyrylǵan shou boldy. Alyp quyrshaq-qaharmandar akterlermen bírge meıírím, jaryq pen adam júregíníń kúshí turaly áserlí oqıǵany kórermenderge ūsyndy. Immersıvtí formattaǵy qoıylym barlyq kórsetílímde kópshílík qyzyǵushylyǵyn tudyryp, anshlagpen óttí.
«Būl bíz ómír súríp jatqan qala, adamdar jáne árkím óz qolymen jasaı alatyn jaryq turaly festıval. Bíz Almatynyń shynaıy bolmysyn – jyly, ashyq jáne dostyq ruhyn qaıta sezíngímíz keldí. Qonaqtardan kelgen kerí baılanys būl maqsattyń júzege asqanyn kórsettí», – dep joba tek jańa jyldyq merekesímen shektelmeıtínín aıtty festıval prodyuserí Maıra Izmaılova.
Muzykalyq baǵdarlama festıvaldíń jarqyn bólígíne aınaldy. Panfılov kóshesí boıynda bírneshe kún qatarynan DJ-marafon ótíp, qalanyń úzdík dıdjeılerí 30 jeltoqsanǵa deıín óner kórsetedí. Muzyka men merekelík atmosfera ortalyq kóshení úlken qalalyq meıram alańyna aınaldyrdy.
Sonymen qatar festıval ayasynda jas muzykanttar baıqauy ūıymdastyrylyp, jańa esímder, jandy oryndaular men kórermen energıyasy festıval sahnasyn ashyq shyǵarmashylyq keńístíkke aınaldyrdy. Baıqau nátıjesí 10 qańtar kúní onlaın formatta jarıyalanady.
27 jeltoqsannan bastap festıval aumaǵynda Snow Park qysqy parkí jūmysyn bastady. Būl tau shańǵysy men snoubordtaǵy frıstaıl áuesqoılaryna arnalǵan arnaıy aımaq. Snow Park 4 qańtarǵa deıín kún saıyn 12:00-den 22:00-ge deıín jūmys ísteıdí. Qalanyń qaq ortasynda syrǵanap, jańa jyldyq atmosferany sezínu – Almaty úshín bíregeı tájírıbe boldy.
«Eko-shyrsha Almaty» alleyasy qonaqtardyń erekshe qyzyǵushylyǵyn tudyrdy. Qaıta óńdelgen jáne ekínshí rettík materıaldardan jasalǵan art-shyrshalar kórmesíne open-call arqyly 30-dan astam ótíním túsíp, fınalǵa 15 joba óttí. Ár fınalıstke ıdeyasyn júzege asyru úshín 100000 teńge kólemínde grant beríldí. Eko-shyrshalar alleyasy 31 jeltoqsanǵa deıín qala tūrǵyndary men qonaqtaryna ashyq bolady. Qazylar alqasynyń dauys beru nátıjesí boıynsha baıqau jeńímpazdary 28 jeltoqsan kúní anyqtalyp, aqshalaı syılyqtar tabystaldy.
Festıvaldíń áleumettík júregíne aınalǵan joba «Igí ísterí kıíz úıí» qaıyrymdylyq aktsıyasy boldy. Qonaqtar qoldauǵa mūqtaj balalar men eresekterdíń armany jazylǵan hattaryn oqyp, tílekterín oryndauǵa múmkíndík aldy. Būl bastama meıírím, janashyrlyq jáne ortaq jauapkershílík syndy festıvaldíń basty qūndylyqtaryn aıqyn kórsettí.
«Panfılovtaǵy Jańa jyl» festıvalí Almatynyń mádenı ómíríndegí mańyzdy oqıǵaǵa aınalyp, qaladaǵy merekeníń jańa formatyn, áleumettík jauapkershílík pen ekologıyalyq sanany bíríktírgen alań retínde este qaldy.