2026 jyly 11 sáuírde Almatyda «Taza Qazaqstan» respublıkalyq baǵdarlamasy ayasynda jalpyqalalyq senbílíkter ūıymdastyryldy, – dep habarlaıdy aqshamnews.kz tílshísí.
Ís-sharalar qalanyń ekologıyalyq jaǵdaıyn jaqsartuǵa, sanıtarlyq mádenıettí arttyruǵa jáne qalalyq ortany kórkeıtuge baǵyttaldy. Būl turaly qalanyń kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
«Móldír būlaq» ekologıyalyq aktsıyasy qalanyń segíz audanyndaǵy 23 nysandy qamtydy. Ís-sharalarǵa 36 300 adam qatysyp, 365 bírlík arnaıy tehnıka jūmyldyryldy.
Júrgízílgen jūmystardyń nátıjesínde 2590 tekshe metr qoqys pen qaldyq shyǵaryldy. Sonymen qatar, senbílík ayasynda 50 aǵash pen 700 būta egílíp, būl qaladaǵy jasyl jelektí kóbeıtuge jáne ekologıyalyq ahualdy jaqsartuǵa yqpal ettí.
Ásírese, Medeu jáne Alatau audandarynda qatysushylar sany kóp, būl ekí audanda jalpy 15 myńnan astam adam senbílíkke qatysty. Sondaı-aq, Bostandyq, Áuezov jáne Nauryzbaı audandarynda da tazalyq jūmystary keń kólemde júrgízíldí.
Jūmystar qalanyń negízgí aumaqtaryn qamtydy: Úlken Almaty, Esentaı jáne Qarasu ózenderíníń jaǵalaulary, aula aumaqtary, sayabaqtar men qoǵamdyq keńístíkter tazartyldy. Ásírese, aryq júıelerín, jasyl aımaqtardy jáne tūrǵyndar kóp jınalatyn oryndardy tazalauǵa erekshe kóńíl bólíndí.