Almatyda Kreshenıe merekesine baılanysty sýǵa túsýge bolatyn oryndardyń tizimi jarıalandy

2026 jylǵy 18–19 qańtar kúnderi Almaty qalasynda Kreshenıe merekesine arnalǵan dástúrli sýǵa túsý rásimderi ótedi. Qaýipsizdikti qamtamasyz etý maqsatynda qala aýmaǵynda arnaıy jabdyqtalǵan 10 resmı oryn belgilendi. Bul týraly Óńirlik komýnıkasıalar qyzmetinde ótken brıfıńte Almaty qalasy Tótenshe jaǵdaılar departamenti men pravoslav shirkeýiniń ókilderi málimdedi, dep habarlaıdy aqshamnews.kz

Jaýapty qyzmetterdiń habarlaýynsha, barlyq alańdar tıisti mekemelermen kelisilip, dinı rásimdi qaýipsiz jaǵdaıda ótkizýge tolyq daıyndalǵan.

«Kreshenıede shomylý – eń aldymen rýhanı dástúr. Oǵan ár adam sanaly túrde qatysyp, óz densaýlyǵyna jaýapkershilikpen qarap, belgilengen qaýipsizdik talaptaryn qatań saqtaýy tıis», – dedi pravoslav shirkeýiniń ókili Aleksandr Sývorov.

Bıyl shomylý rásimderi qalanyń barlyq aýdanyndaǵy pravoslav shirkeýleri aýmaǵynda uıymdastyrylady. Ár oryn úshin naqty kúnder men jumys ýaqyty belgilengen.

Shomylýǵa arnalǵan resmı oryndar tizimi:

1. Kresovozdvıjenskıı shirkeýi – Qarasý shaǵynaýdany, Vysokovoltnaıa kósh., 37B
   (18 qańtar 11:00–15:00; 19 qańtar 00:00–22:00)

2. Hrıstos ǵıbadathanasynyń prıhody – Raıymbek dańǵ., 493
   (18 qańtar 12:00-den 19 qańtar 22:00-ge deıin)

3. Nıkolaı sobory – Baıtursynov kósh., 56/5
   (18 qańtar 11:00–16:00; 19 qańtar 11:00–18:00)

4. Ýspenskıı shirkeýi (Pervomaıskıı kenti) – Qudabaıuly kósh., 86
   (19 qańtar 09:30–23:00)

5. Paraskeva shirkeýi – Jansúgirov kósh., 500V
   (18 qańtar 22:00-den 19 qańtar 22:00-ge deıin)

6. Iver-Serafım áıelder ǵıbadathanasy – Hamıdı kósh., 30
   (18 qańtar 10:30-dan 19 qańtar 23:00-ge deıin)

7. Blagoveshenskıı shirkeýi – Alataý shaǵynaýdany, Ibragımov kósh., 13
   (18 qańtar 23:30-dan 19 qańtar 23:00-ge deıin)

8. Qazan ıkonasy shirkeýi – Halıýllın kósh., 45A
   (18 qańtar 10:30-dan 19 qańtar 16:00-ge deıin)

9. Rojdestvo prıhody – Aqjar shaǵynaýdany, Eginsý kósh., 1B
   (18–19 qańtar 12:00–20:00)

10. Pokrov-Vsehsvát shirkeýi – Iýnyh Pıonerov kósh., 85
    (19 qańtar 11:30–19:00)

Almaty qalasy Tótenshe jaǵdaılar departamenti basqarmasynyń bastyǵy Denıs Iarsevtiń aıtýynsha, barlyq rásim ótetin oryndarda qutqarý jáne medısınalyq qyzmetter táýlik boıy kezekshilik etedi.

«Azamattardyń qaýipsizdigin qamtamasyz etý úshin Tótenshe jaǵdaılar departamenti, Polısıa departamenti, Respýblıkalyq jedel-qutqarý jasaǵy, Qalalyq qutqarý qyzmeti, Apattar medısınasy ortalyǵy men dárigerler jumyldyryldy. Barlyq shomylý oryndary aldyn ala tekserilip, tolyq daıyndyqtan ótti», – dedi ol.

TJD ókilderi tek resmı túrde belgilengen oryndarda ǵana shomylýǵa ruqsat etiletinin eskertedi. Jaǵalaýy taıǵaq, muzy turaqsyz jáne sý aǵysy qatty bolǵandyqtan, basqa sý aıdyndarynda, sonyń ishinde toǵandarda, Úlken jáne Kishi Almaty ózenderinde shomylýǵa qatań tyıym salynady.

Qaýipsizdik maqsatynda azamattarǵa myna talaptardy saqtaý usynylady:

• tek arnaıy belgilengen oryndarda shomylý;

• mas kúıde sýǵa túspeý;

• muz ústindegi oıyq mańynda bir mezette 3 adamnan artyq turmaý;

• shomylý aldynda deneni qyzdyrý úshin jeńil jattyǵý jasaý;

• qutqarýshylar men medısına qyzmetkerleriniń baqylaýynda shomylý;

• shomylǵannan keıin qurǵaq kıim kıip, jyly shaı ishý.

Uıymdastyrýshylar almatylyqtardy Kreshenıe merekesindegi rásimderge jaýapkershilikpen qarap, aýa raıy men jeke densaýlyǵyn eskerýge shaqyrady.