Almatyda kommunaldyq qyzmet qardyń jauuy men aua temperaturasynyń tómendeuíne jan-jaqty daıyndyq júrgízdí. Qalanyń barlyq óndírístík bazasy kúsheıtílgen jūmys tártíbíne auystyrylyp, kóshelerdí uaqytyly tazalau árí kólík pen júrgínshíler qozǵalysynyń qauípsízdígín qamtamasyz etu úshín tehnıka men qyzmetkerlerdíń táulík boıǵy kezekshílígí ūıymdastyryldy. Būl turaly qalalyq Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
Qolaısyz aua raıyna ázírlík ayasynda júrgízushíler, mehanızatorlar men jol salasy jūmysshylarynyń kúsheıtílgen auysymdary jasaqtaldy. Qar jauǵanǵa deıín 210 qūmsepkísh tehnıka kezekshílíkke qoıylyp, kóktaıǵaqtyń aldyn alu maqsatynda negízgí magıstraldarǵa sūıyq reagentter aldyn ala sebíldí.
Qala aumaǵynda táulík boıy 1030 bírlík arnaıy tehnıka men 2710 jol salasy jūmysshysyn jūmyldyru josparlanǵan. Sonymen qatar aulalardy tazalau jūmystaryna basymdyq berílíp, būl baǵytta 1790 jūmysshy men 256 tehnıka tartylmaq.
Aua raıynyń kúrt ózgeruíne jedel áreket etu úshín jol jabynynyń jaǵdaıyna baqylau kúsheıtíldí. Qalada 75 mobıldí brıgada qūrylyp, olar eń qauíptí aumaqtardy, eńísterdí, dóńderdí, jolaıyryqtardy jáne kólík qozǵalysy qarqyndy kóshelerdí baqylauda ūstaıdy.
Tótenshe jaǵdaıǵa áreket etu qyzmetí de tolyq daıyndyqta. Almaty qalasynyń Qūtqaru qyzmetí 16 arnaıy tehnıka men 50 mamannyń kezekshílígín qamtamasyz ettí. Al Tótenshe jaǵdaılar departamentíníń 53 tehnıka bírlígí men 244 qyzmetkerí táulík boıy kezekshílík atqarady. Audan ákímdíkterínde atqarylyp jatqan jūmystarǵa tūraqty baqylau ornatylǵan.
Osyǵan baılanysty qala tūrǵyndarynan aua temperaturasynyń tómendeuí men kóktaıǵaq qaupín eskere otyryp, saqtyq sharalaryn qatań saqtau sūralady. Júrgízushílerge jyldamdyqty shekteu, araqashyqtyqty saqtau jáne kúrt būrylmauǵa keńes beríledí. Al júrgínshílerge trotuarda jáne ǵımarat mańynda asa mūqıyat bolu qajet.