Almaty qalasynda 2025 jyldyń basynan beri 20,2 myńnan astam adamdy jumyspen qamtýǵa baǵyttalǵan belsendi is-sharalarǵa tartyldy. Bul týraly Almaty qalasynyń Halyqty jumyspen qamtý ortalyǵynyń dırektory Ádilet Janabaev Óńirlik komýnıkasıalar qyzmetinde ótken baspasóz konferensıasynda habarlady.
Ortalyqtyń málimetinshe, olardyń ishinde 14,9 myń almatylyq turaqty jáne sýbsıdıalanatyn jumys oryndaryna ornalastyrylǵan. Jyl sońyna deıin qalada keminde 87,2 myń jańa jumys ornyn ashý josparlanyp otyr.
«2024–2029 jyldarǵa arnalǵan Eńbek naryǵyn damytý tujyrymdamasy aıasynda bıyl Almatyda 8,3 myń jańa jumys orny ashyldy. Onyń 98,2 paıyzy – turaqty jumys. Jalpy jospar boıynsha 2025 jyly 87,2 myń jumys orny qurylýy tıis, onyń 73,3 myńy – turaqty jumys», – dedi Ádilet Janabaev.
Sonymen qatar, 1,7 myńnan astam jas kásipker «Bastaý Bıznes» jobasy aıasynda qoldaý aldy. 3 myńnan astam azamat kásibı oqýdan ótti. Olardyń 2 831-i – onlaın (skills.enbek platformasy arqyly), al 167-si – oflaın formatta bilim alǵan. Budan bólek, 17,5 myńǵa jýyq mektep oqýshysy, stýdent jáne jumyssyz azamatqa kásibı baǵdar berildi.
Qysqamerzimdi kásibı oqytý men jastar tájirıbesi baǵdarlamalary da tabysty iske asýda.
«Baǵdarlama sheńberinde memleket oqyp jatqan azamattarǵa aı saıyn 43 574 teńge kóleminde stıpendıa nemese 20 AEK mólsherinde eńbekaqy tóleıdi. Sonymen qatar, oqý ortalyqtaryna nemese jumys berýshilerge oqytý qyzmeti úshin memleket aı saıyn 70 myń teńge tóleıdi. Oqýdy aıaqtaǵan azamattardy jumys berýshi keminde 6 aıǵa jumysqa alýy tıis», – dep túsindirdi spıker.
2025 jylǵy 16 maýsymdaǵy jaǵdaı boıynsha oqýǵa 167 adam joldanǵan. Olardyń 70-i oqýdy aıaqtap, 47-si jumysqa ornalasqan. Qazirgi ýaqytta 31 mamandyq boıynsha 763 bos jumys orny bar. Olardyń qatarynda tiginshi, shashtaraz, avtoelektrık, kondıter, satýshy jáne basqa da kásipter bar.
Jastar tájirıbesi baǵdarlamasy – jumys tájirıbesi joq jas mamandarǵa mamandyǵy boıynsha alǵashqy aqyly jumysqa ornalasýǵa múmkindik beredi. Bıyl bul baǵdarlama arqyly 236 adam jumysqa ornalasqan. Elektrondyq eńbek bırjasyna 1 218 habarlandyrý arqyly 1 554 bos jumys orny tirkelgen.
Júzege asyrylyp jatqan is-sharalar nátıjesinde Almaty qalasynda jumyssyzdyq deńgeıi 4,6%-dan 4,5%-ǵa deıin tómendegen.
Sonymen qatar, jumyssyz azamattar kásibı daǵdysyn tegin rastaý múmkindigine ıe boldy. Osy maqsatta vaýcherlik júıe engizildi.
«Bir rettik vaýcher azamatqa óziniń kásibı biliktiligin rastap, jumys tájirıbesi men daǵdysyn dáleldeýge múmkindik beredi. Bul óz kezeginde jumysqa ornalasýdy jeńildetedi. Vaýcherler kásibı biliktilikti taný ortalyqtary arqyly beriledi jáne jumyssyzdar úshin bul qyzmet tegin», – dep atap ótti Ádilet Jańabaev.
Vaýcher alý úshin azamattyń «jumyssyz» mártebesi bolýy, Career Enbek platformasyna tirkelip, jeke kabınet arqyly onlaın ótinish berýi qajet. Biliktilikti taný myna salalar boıynsha júrgiziledi:
• týrızm;
• qonaq úı bıznesi;
• aqparattyq tehnologıalar;
• áleýmettik qyzmet kórsetý.
2024 jyly Almatyda eńbek qyzmetin jalǵastyrǵysy keletin belsendi zeınetkerlerge qoldaý kórsetý maqsatynda «Altyn jas» jobasy iske qosyldy. Osy baǵdarlamamen 2024 jyly 704 zeınetker, bıyl – 350 zeınetker, jalpy sany 1 054 zeınetker jumysqa ornalasqan. 2024–2026 jyldarǵa arnalǵan jalpy jospar 1 500 adamdy qamtyǵan.
«Basty maqsat - eńbekke qabiletti barlyq azamat úshin jumyspen qamtýdyń tıimdi tetikterin jasaý jáne memlekettik qoldaýdy tolyq iske asyrý», – dedi Ádilet Jańabaev.