Bıyl Qazaqstan halqy Assambleyasynyń qūrylǵanyna 30 jyl tolyp otyr — būl qoǵamdyq ınstıtut Memleket basshysynyń Jarlyǵymen qūrylǵan. Dál osy Almatyda Assambleyany qūru turaly sheshím qabyldanyp, qazaqstandyq ūltaralyq kelísím úlgísíníń negízgí qaǵıdattary qalyptastyryldy.
Respublıkalyq Dostyq úıínde Qazaqstan halqy Assambleyasynyń 30 jyldyǵyna arnalǵan keńeıtílgen otyrys óttí. Qazaqstan Respublıkasy Prezıdentí Qasym-Jomart Toqaevtyń tapsyrmasy boıynsha Almaty qalasynyń ákímí Erbolat Dosaev «Qazaqstan halqy Assambleyasyna 30 jyl» mereıtoılyq medaldy etnomádenı bírlestíkterdíń ókílderíne, máslıhat deputattaryna jáne Assambleya ardagerleríne tabys ettí. Olar elímízdegí etnosaralyq kelísímdí damytuǵa aıtarlyqtaı úles qosqan.
«Qazaqstan Respublıkasy Prezıdentí Qasym-Jomart Kemelūly Toqaev Assambleyanyń halyqtyq dıplomatıyanyń bíregeı ınstıtuty retínde mańyzdylyǵyn árdaıym atap ótedí. 1995 jylǵy 1 nauryzda Almatyda – Qazaqstan táuelsízdígíníń besígí sanalǵan qalada – Qazaqstan halqy Assambleyasyn qūru turaly Qazaqstan Prezıdentíníń Jarlyǵyna qol qoıyldy. Dál osy qalamyzda keıínnen memlekettík sayasattyń bír bólígíne aınalǵan jáne eldíń tūraqtylyǵy men damuynyń basty faktoryna aınalǵan ūltaralyq kelísím men bírlíktíń bíregeı qazaqstandyq úlgísíníń írgetasy qalandy», - dedí Almaty ákímí Erbolat Dosaev.
Otyrysta sóz sóılegen qala ákímí Erbolat Dosaev Assambleyanyń sońǵy otyz jylda halyq dıplomatıyasy men dıalogtyń pármendí ınstıtutyna aınalǵanyn, «Áraluandyqtaǵy bírlík» qaǵıdatyn nyǵaıtyp, jahandyq syn-qater jaǵdaıynda tūraqtylyqtyń negízí bolyp otyrǵanyn atap óttí.
Marapattalǵandardyń atynan qatysushylar joǵary memlekettík baǵa úshín alǵys aıtyp, beıbítshílík, bírlík jáne azamattyq bíregeılíktí nyǵaıtu jolynda jūmysyn jalǵastyra beretínín jetkízdí. Bayandamashylar sózínde ūltaralyq sením, tarıhı rızashylyq pen ruhanı bírlík qūndylyqtaryna erekshe nazar audardy.
«Qazaq halqynyń qonaqjaılyǵy men meıírímdílígí, sondaı-aq, ózge etnostardyń alǵysy men rızashylyǵy – Assambleyanyń tíregí bolyp tabylatyn dostyq, ózara túsínístík pen ashyqtyqtyń negízí», – dedí «Almaty koreı ūlttyq ortalyǵy» qoǵamdyq bírlestígíníń tóraǵa orynbasary Georgıı Kan.
Būdan keıíngí damudyń mańyzdy baǵyty – etnomádenı bírlestíkterge arnalǵan zamanauı ınfraqūrylymdy qalyptastyru bolmaq. Osy rette Almaty qalasynyń ákímí Erbolat Dosaev shaharda jańa Dostyq úıín salu jospary bar ekenín málímdedí.
«Búgínde 30-dan astam etnomádenı bírlestík Dostyq úıínde belsendí jūmys júrgízude. Bíz olardy zamanauı, mádenı almasu ortalyǵy bolatyn, ashyqtyq pen áraluandyqqa qūrmettíń sımvolyna aınalatyn alańmen qamtamasyz etudí mańyzdy dep sanaımyz», - dedí ol.
Sondaı-aq, ákímníń aıtuynsha, Almatyda qalalyq QHA qoldauymen tórt ūlttyq teatr men jetí etnostyq BAQ redaktsıyasy tabysty jūmys ístep jatyr. Būl tílder men mádenıettí saqtap, ūltaralyq dıalogty nyǵaıtuǵa yqpal etedí.
Erbolat Dosaev azamattyq bastamalar men qazaqstandyq bíregeılíktí qalyptastyruǵa baǵyttalǵan jobalarǵa erekshe toqtaldy. Almatyda Assambleyanyń qoldauymen bílím beru, patrıottyq jáne ekologıyalyq bastamalar júzege asyrylyp jatyr. Aksaqaldar men Analar keńesí de belsendí jūmys atqaryp otyr. Bıyl qalada Respublıkalyq aqsaqaldar keńesí men Analar keńesíníń forumy ótedí.
«Yntymaq» deputattyq tobymen bírlesíp, jastardy qoldau boıynsha bírqatar bastama íske qosyldy. Atap aıtqanda, «Qaıratker» jas sayasatker mektebí, «Máslıhat LUB» bílím beru jobasy jáne «Raqmet, Jer-Ana!» ekologıyalyq aktsıyasy ūıymdastyryldy.
Otyrys barysynda etnomádenı bírlestíkter men jastar ūıymdarynyń ókílderí qoldau kórsetkení úshín alǵys aıtyp, Almatynyń qoǵamdyq jáne mádenı bastamalardyń flagmany retíndegí rólín atap óttí.
«Jastardyń eń myqty bastamalary dál osy Almatyda bastalady. Bízdíń megapolıs basqa óńírlerge úlgí bolyp otyr», - dedí Almatydaǵy «Assambleya jastary» RQB ókílí Rustam Qaıryev.
Sóz sońynda Erbolat Dosaev Qazaqstan Prezıdentíníń atynan Assambleya ókílderíne elímízdíń damuyna qosqan úlesí úshín alǵys aıtty. Onyń aıtuynsha, mereıtoılyq marapattar – beıbítshílík, bírlík pen ūltaralyq úılesím jolynda adal qyzmetí úshín berílgen joǵary memlekettík baǵanyń kórínísí.