2030 jylǵa qaraı Almatyda bír tūrǵynǵa shaqqandaǵy jasyl jelekpen qamtamasyz etu kórsetkíshí 15 sharshy metrge deıín ūlǵaıtylady, - dep habarlaıdy Aqshamnews.kz tílshísí.
Almatyda jasyl jelek qoryn jańartu men damytuǵa baǵyttalǵan keshendí baǵdarlama júıelí túrde júzege asyrylyp keledí. «Taza Qazaqstan» baǵdarlamasy ayasynda jasyl jelektíń qazírgí jaǵdaıy jáne 2026 jylǵa arnalǵan kógaldandyru jospary qaraldy. Būl turaly qalanyń Ekologıya jáne qorshaǵan orta basqarmasynyń ókílderí aıtty.
2018-2019 jyldary júrgízílgen túgendeu qorytyndysyna sáıkes, qala aumaǵynda 4,3 mıllıonnan astam aǵash ósedí. Jasyl jelekterdí ǵylymı negízde jáne júıelí basqaru maqsatynda 2026-2030 jyldarǵa arnalǵan bes jyldyq dendrologıyalyq jospar ázírleníp jatyr. Qūjat jańa túgendeu men orman-patologıyalyq zertteu nátıjeleríne súıene otyryp daıyndalyp, jasyl qordy sauyqtyru, jańartu jáne ornyqty damytuǵa baǵyttalǵan keshendí sharalardy qamtıdy.
2026 jyly qalanyń barlyq audany boıynsha dendrologıyalyq jospardy ázírleu jūmystary ayaqtalady dep josparlanǵan. 2027 jyldan bastap kógaldandyru jáne jasyl aımaqtardy jańartu jūmystary bekítílgen qūjatqa sáıkes júrgízíledí.
Aǵashtardyń sanıtarlyq jaı-kúıí men qauípsízdígíne erekshe nazar audarylyp otyr. 2022 jyldan berí jasyl jelek qoryn jańartuǵa arnalǵan bes jyldyq baǵdarlama íske asyrylyp keledí. Kóshelerdí qaıta jańartu ayasynda bıíktígí 5-6 metr bolatyn írí kólemdí aǵashtar, sondaı-aq qalalyq ortaǵa beıímdelgen būtalar kezeń-kezeńímen otyrǵyzylady.
Memleket basshysynyń tapsyrmasyna sáıkes, 2030 jylǵa deıín 2,5 mıllıon jasyl jelek otyrǵyzudy kózdeıtín Jol kartasy júzege asyrylyp keledí. 2023-2025 jyldar aralyǵynda 1,06 mıllıonnan astam kóshet egíldí. 2025 jyly alǵash ret írí kólemdí aǵashtardy jappaı otyrǵyzu bastalyp, būl tolyqqandy jasyl ınfraqūrylymdy jedel qalyptastyruǵa jáne qalalyq ortanyń jaılylyǵyn arttyruǵa múmkíndík berdí. 2030 jylǵa qaraı bír tūrǵynǵa shaqqandaǵy jasyl jelekpen qamtamasyz etu kórsetkíshín 15 sharshy metrge deıín jetkízu josparlanǵan.
Sonymen qatar jasyl jelekterdí zıyankester men aurulardan qorǵau baǵytyndaǵy júıelí jūmys jalǵasyp otyr. 2020 jyldan berí hımıyalyq-bıologıyalyq óńdeu júrgízílíp, sonyń nátıjesínde zaqymdanu deńgeıí 20-22%-ǵa deıín tómendedí.
