«Jas Qanat» tūrǵyn úı keshenínde ornalasatyn Almaty kítaphanalarynyń jańa fılıalynda ınteraktıvtí aımaqtary, tsıfrlyq servısterí jáne shyǵarmashylyq sheberhanalary bar zamanauı balalar kítaphanasy ashylady. Būl ıdeya segíz almatylyq kítaphanashy Estonıya, Fınlyandıya jáne Shvetsıyada ótken «Shekarasyz bílím» atty halyqaralyq taǵylymdamadan keıín tuyndady. Būl turaly Almaty qalasy Mádenıet basqarmasy habarlady.
Tallınde mamandar kítaphanalardyń balabaqshala jáne mekteptermen yqpaldasuyn, ūrpaqaralyq oqytu úlgílerín zerttedí. Helsınkıde tsıfrlyq ózín-ózí qyzmet kórsetu júıesín: sensorly dúńgírshekter men QR-gıdterdí, OODI Ūlttyq kítaphanasynyń tájírıbesín kórdí. Shvetsıyada ǵylym, tehnologıya, ınjenerıya, óner jáne matematıkany bíríktíretín STEAM-jobalarymen tanysty.
Būl ıdeyalar qazírdíń ózínde engízílíp jatyr: orta bílím beru ūıymdarymen áríptestík auqymy keńeıíp, balalardy mektep tabaldyryǵyn attaǵan sátten bastap kítap oquǵa baulu múmkíndígí artty; úıírme baǵdarlamalary jańartyldy; Alatau Creative Hub bazasynda oqu men shyǵarmashylyq kezdesulerge arnalǵan jazǵy terrasa jasaqtaldy.
«Būl taǵylymdama qyzmetkerlerímízge shabyt qana emes, naqty qūraldar da berdí. Jańa fılıalda ınteraktıvtí aımaqtary, tsıfrlyq servısterí jáne sheberhanalary bar zamanauı balalar kítaphanasy ashylady. 1 qyrkúıekten bastap bírínshí synyp oqushylary úshín ashyq esík kúnderín ótkízemíz, al aǵa buynǵa arnalǵan kompyuterlík sauattylyq baǵdarlamasyn kúsheıtemíz. Mūnyń bárí bízdíń mamandar Estonıya, Fınlyandıya jáne Shvetsıyada kóríp, beıímdelgen sheshímder. Qazírdíń ózínde būl jobalar almatylyqtardyń ıgílígíne qyzmet ete bastady», — dedí Almaty kítaphanalarynyń dırektory Meıram Bektembaev.
Būl almatylyq kítaphanashylardyń alǵashqy halyqaralyq taǵylymdamasy emes. Būǵan deıín 22 maman Koreya Respublıkasynda, Shveıtsarıya men Germanıyada bílím alǵan. Úzdík tájírıbeler Almaty kítaphanalaryn zamanauı bílím, tehnologıya jáne mádenı qarym-qatynas ortalyqtary retínde damytuǵa jol ashyp otyr.
Búgínde qala tūrǵyndaryna táulík boıy qyzmet kórsetetín 24/7 kítaphana fılıaldary, metro men sauda ortalyqtaryndaǵy avtonomdy ózín-ózí qyzmet kórsetu beketterí, tsıfrlyq kítap qory bar almatylibrary.kz portaly, ınklyuzıvtí alańdar jáne mazmūndy mádenı-tanymdyq ís-sharalar baǵdarlamalary qoljetímdí.