Almaty qalasynda patrúldik polısıa qyzmetkerleri esirtki quraldaryn ótkizýmen aınalysty degen kúdikpen er adamdy ustady.
Tańǵy saǵat 05:00 shamasynda Almaly aýdanyndaǵy turǵyn úılerdiń biriniń aýlasynda, Qarasaı batyr men Jarokov kósheleriniń qıylysyna jaqyn mańda patrúldik ekıpaj jas jigittiń kúmándi áreketine nazar aýdarǵan. Kúdiktini tintý barysynda odan untaq tárizdi zat salynǵan oramalar tabyldy.
Sot-hımıalyq saraptamanyń qorytyndysyna sáıkes, tárkilengen zat sıntetıkalyq esirtki bolyp shyqty. Atalǵan derek boıynsha Almaly aýdandyq polısıa basqarmasy qylmystyq is qozǵady. 20 jastaǵy kúdikti ýaqytsha ustaý ızolátoryna qamaldy.
Aldyn ala málimetterge sáıkes, ustalǵan azamat esirtkini jasyryn qoıyp ketýshi retinde jumys istegen. Iaǵnı tapsyrmalardy ınternet arqyly alyp, jasyryn oryndardyń koordınattaryn jáne aqshalaı syıaqyny onlaın formatta alǵan.
Qazirgi ýaqytta jedel bólimsheler zańsyz áreketti uıymdastyrǵan tulǵalardy anyqtaý jumystaryn júrgizýde. Olar ustalyp, zańǵa sáıkes jaýapkershilikke tartylady.
"Búginde esirtki bıznesi jastardy ınternet arqyly ońaı aqsha tabýǵa ýáde berip, qylmystyq áreketke tartýǵa tyrysýda. Alaıda munyń sońy árdaıym qylmystyq jaýapkershilikke ákelip, adamnyń taǵdyryn uzaq jyldarǵa kúıretedi. Birde-bir "tapsyrys berýshi" tasada qalmaıdy — biz barlyq uıymdastyrýshylardy anyqtap, jumysty sońyna deıin jetkizemiz", — dedi Almaty qalasy polısıa departamenti esirtki qylmysyna qarsy is-qımyl basqarmasynyń bastyǵy Murat Jumabaev.
Sondaı-aq ol jastarǵa úndeý jasady.
"Jyldam ári ońaı tabys týraly ýádelerge senbeńizder. Esirtki tasymaldaýshy bolý — qosymsha tabys emes, aýyr qylmys. Mundaı tańdaýdyń jalǵyz nátıjesi — bas bostandyǵynan aıyrý jáne búlingen ómir. Ózińizdi jáne bolashaǵyńyzdy qorǵańyz", — dep túıindedi spıker.