Almatydaǵy Ortalyq stadıonda ótetín Enrıke Iglesıastyń kontsertíne daıyndyq jalǵasyp jatyr, dep habarlaıdy aqshamnews.kz tílshísí.
Kórermenderden qauípsízdík talaptaryn aldyn ala eskeru sūralady. Stadıon aumaǵyna basqa kelushílerge kedergí keltíruí nemese qauíp tóndíruí múmkín kólemdí zattardy, tez tūtanatyn jáne qauíptí zattardy, alkogol ónímderín, tyıym salynǵan zattardy, drondar men basqa da ūshqyshsyz qūrylǵylardy alyp kíruge bolmaıdy.
Būǵan deıín habarlanǵandaı, stadıonǵa kírer esíkter saǵat 16:00-de ashylady. Negízgí kíreberís Abaı dańǵyly men Baıtūrsynūly kóshesí jaǵynan ūıymdastyrylady. VIP Standing A sanatyndaǵy bılet ıelerí úshín Sátbaev kóshesí jaǵynan bólek kíreberís qarastyrylǵan.
Kontsert bastalar aldynda kezekke tūrmas úshín kórermenderden stadıonǵa aldyn ala kelíp, baqylaudan ótuge ketetín uaqytty eskeru sūralady.
Kontsert ótetín jerge qoǵamdyq kólíkpen jetuge bolady. Avtobustar men metro qalypty rejımde jūmysyn jalǵastyrady. Kontsert ayaqtalǵannan keıín kórermender úshín Abaı dańǵyly men Baıtūrsynūly kóshesí jaǵynan júretín qosymsha shattldar qarastyrylǵan.
Shattldar áuejaı, Orbıta, Almaty-1 temírjol vokzaly, Raıymbek – Alatau jáne «Almaty Arena» baǵyttary boıynsha qatynaıdy.