Óńírlík kommunıkatsıyalar qyzmetí alańynda Qazaqstandaǵy Ǵylym kúní men áleumettík-gumanıtarlyq zertteulerdí damytudyń bolashaǵyna arnalǵan baspasóz konferentsıyasy bolyp óttí, – dep habarlaıdy aqshamnews.kz tílshísí.
Ál-Farabı atyndaǵy Qazaq ūlttyq unıversıtetíníń pedagogıka ǵylymdarynyń doktory, professory Akmaral Magauova ınklyuzıvtí bílím beru búgíngí tańda memlekettík bílím beru sayasatynyń negízgí strategıyasynyń bírí árí ádílettí de tūraqty qoǵam qalyptastyrudyń mańyzdy sharty ekenín málímdedí.
Spıkerdíń aıtuynsha, qazírgí bílím beru júıesí tūlǵany damytu men barshaǵa teń múmkíndík ūsynuǵa baǵyttalǵan jańaru kezeńín bastan ótkeríp jatyr. YuNESKO men Bíríkken Ūlttar Ūıymy qūjattarynda bekítílgen ınklyuzıvtí tásíl ashyq árí tózímdí qoǵam qūrudyń negízí retínde qarastyrylady.
«Qazírgí álem jańa bílím beru paradıgmasyna kóshe bastady, onyń ortalyǵynda adam men onyń damuy tūr. Inklyuzıvtí bílím beru osy júıeníń ajyramas bólígíne aınalyp barady. Ol bílím men múmkíndíkke ár adamnyń bírdeı qoly jetetín qoǵam qalyptastyruǵa ūmtylady», — deıdí spıker.
Qazaqstan halyqaralyq tásíldí, sonyń íshínde 2008 jyly ratıfıkatsıyalanǵan BŪŪ-nyń Múgedekterdíń qūqyǵy turaly konventsıyasy erejesín belsendí túrde engíze bastady. Ūlttyq zańnama barlyq azamattyń, ásírese erekshe bílím beruge mūqtaj jandardyń bílím alu qūqyǵyn da qamtamasyz etedí.
«Inklyuzıvtí bílím beru álemdík qauymdastyq tarapynan teńdíktí qamtamasyz etudíń tıímdí tetígí retínde moıyndalǵan. Qazaqstanda būl bílím beru júıesín damytudyń zańdy kezeńíne aınalyp, ınklyuzıvtí qoǵam qūruǵa degen ūmtylys pen betalysty kórsetedí. Memleket ár adamnyń bílím alu qūqyǵyn júzege asyruy úshín jaǵdaı jasap jatyr», — dep atap óttí spıker.
Qazírgí tańda elde ınklyuzıvtí joǵary bílím beru júıesí qalyptasyp keledí. Būl múmkíndígí shekteulí jandarǵa mamandyq alyp, qoǵamǵa kíríguge jol ashady. Bílím jáne ǵylym mınıstrlígíníń málímetíne qaraǵanda, qazír joǵary oqu orynnynda 1400-den astam múgedektígí bar student bílím alyp jatyr. Olardyń arasynda eń sūranysqa ıe baǵyttar — pedagogıka, áleumettík jūmys, qūqyqtanu, ekonomıka men aqparattyq tehnologıyalar eken.
«Erekshe bílím beruge mūqtaj adamdar úshín bílím beru — áleumettenudíń mańyzdy qūraly. Ol áleumettík mártebení arttyryp, kásíbı ósuge múmkíndík beredí. Sondyqtan ınklyuzıvtí joǵary bílímdí damytu – basym míndettíń bírí», — dedí Akmaral Magauova.
Memlekettík sayasat ayasynda kedergísíz orta qalyptastyru, beıímdelgen bílím beru baǵdarlamalaryn ázírleu men jeke oqu traektorıyalaryn engízu boıynsha jūmys ístelíp jatyr. Studentterdí psıhologıyalyq-pedagogıkalyq qoldauǵa, olardyń áleumettík jáne kásíbı beıímdeluíne kóp kóńíl bólíngen.
«Bílímge qoljetímdílíktí qamtamasyz etu ǵana emes, studentterdíń tabysty beıímdeluíne jaǵdaı jasau da mańyzdy. Būl bílím beru, psıhologıyalyq, áleumettík jáne medıtsınalyq qoldaudy qamtıdy. Tek keshendí tásíl ǵana shynaıy ınklyuzıyaǵa qol jetkízuge múmkíndík beredí», — deıdí ol.
Sonymen qatar, Qazaqstanda erekshe bílím beru qajettílígí bar studentterdíń ózín-ózí kásíbı aıqyndauyn qalyptastyruǵa baǵyttalǵan ǵylymı joba júzege asyryla bastady. Onyń ayasynda zertteuler, trenıngter men oqytushylarǵa arnalǵan bílíktílíktí arttyru kurstary ótkízílíp jatyr.
Sarapshylardyń píkírínshe, ınklyuzıvtí bílím berudí damyta túsu úshín bílím beru baǵdarlamasyn jetíldíríp, ınfraqūrylymdy keńeıtíp, studentterdí qoldaudy kúsheıte túsu qajet. Qoljetímdí orta qūru, áleumettík-mádenı oqytu modelín engízu men studentterdíń joǵarǵy oqu ornynyń qoǵamdyq ómíríne qatysu deńgeıín arttyru basym baǵyttyń bírí bolyp qaldy.
Kezdesu qorytyndysy boıynsha, ınklyuzıvtílík Qazaqstan qoǵamynyń damuynyń negízgí qaǵıdattarynyń bíríne aınalyp kele jatqany, ol ár azamatqa onyń erekshelíkterí men ómírlík jaǵdaıyna qaramastan teń múmkíndík beretíndígí atap ótíldí.