Almatyda Bıbigúl Tólegenovanyń XIII Halyqaralyq vokalıster baıqaýynyń saltanatty ashylý rásimi ótti. Almaty qalasynyń ákimdiginiń qoldaýymen ótip jatqan halyqaralyq baıqaýǵa bıyl 52 oryndaýshy qatysyp jatyr.
Baq synaýǵa otandyq opera ánshilerimen qatar Armenıa, Reseı, Ózbekstan, Qyrǵyzstan, Mońǵolıa, sondaı-aq Italıada eńbek etip júrgen Qazaqstan men Ýkraınanyń jas talanttary da keldi.
Qazylar alqasynyń tóraıymy – KSRO jáne Qazaqstannyń halyq ártisi, Sosıalısik Eńbek Eri, KSRO men Qazaqstannyń Memlekettik syılyqtarynyń laýreaty, akademık Bıbigúl Ahmetqyzy Tólegenova qatysýshylarǵa jyly lebizin bildirip, sáttilik tiledi.
Saltanatty sharaǵa Qazaqstannyń halyq ártisi Dımash Qudaıbergen de qatysty. Ol Bıbigúl Tólegenovanyń shyǵarmashylyǵyna erekshe tánti ekenin jetkizip, óziniń shyǵarmashylyq jolyndaǵy jetistikterine ustazdyq pen aqyl-keńesteriniń zor yqpal etkenin atap ótti. Ánshi konkýrsanttarǵa shabyt tiledi.
Sahna tórinde baıqaýdyń burynǵy jeńimpazdary da óner kórsetti. Olar ataqty operalyq shyǵarmalardy oryndap, kórermenderge bekzattyq ónerdiń áserli atmosferasyn syılady.
Baıqaý týraly aqparat:
Baıqaý irikteý jáne fınaldyq kezeńnen turady. Barlyq tyńdalymdar qazylar alqasy men kórermen aldynda ótedi. Fınalǵa 12–14 qatysýshy joldama alady.
Jeńimpazdardy bedeldi ataq, qomaqty aqshalaı syılyqtar, sondaı-aq klasıkalyq, halyq jáne qazaqstandyq shyǵarmalardy úzdik oryndaǵany úshin arnaıy júldeler kútedi.
Qatysýshylardyń ónerin vokaldyq ónerdiń tanymal sheberleri kiretin halyqaralyq qazylar alqasy baǵalaıdy.
Bıbigúl Tólegenovanyń halyqaralyq vokalıster baıqaýy óner áleminde kóptegen jańa esimderdi tanytty jáne jas talanttar úshin mańyzdy bastaý alańyna aınaldy. Onyń basty maqsaty – jańa býyndy adamgershilik pen rýhanı sulýlyqta tárbıeleý, sondaı-aq klasıkalyq halyq mýzykalyq murasyn saqtaý jáne nasıhattaý. Búginde baıqaý laýreattary álemniń jetekshi opera sahnalarynda tabysty óner kórsetip, Qazaqstandy laıyqty dárejede tanytýda. Sonymen qatar baıqaýdyń geografıasy jyl saıyn keńeıip keledi.
Esterińizge sala keteıik, Bıbigúl Tólegenovanyń halyqaralyq vokalıster baıqaýy 2001 jyldan beri dástúrli túrde eki jyl saıyn ótkizilip keledi. Kelesi jyly baıqaýǵa 25 jyl tolady.
Qatysýshylarǵa qoldaý kórsetý úshin irikteý kezeńiniń kúnderi – 26-28 qyrkúıek aralyǵynda saǵat 11:00-den 19:00-ge deıin Qurmanǵazy atyndaǵy Qazaq ulttyq konservatorıasynyń Úlken konsert zalyna kelýge bolady.
Fınaldyq týr 30 qyrkúıekte Jambyl atyndaǵy Qazaq memlekettik fılarmonıasynyń Úlken zalynda ótedi.