Almaty ákímí Darhan Satybaldynyń tóraǵalyǵymen balalarǵa arnalǵan Ǵylym muzeıíníń qūrylys barysy men íske qosuǵa daıyndyq máseleleríne arnalǵan keńes óttí. Būl — balalardyń ǵylym men tehnologıyaǵa qyzyǵushylyǵyn arttyruǵa baǵyttalǵan jańa bílím beru keńístígí.
Keńeste atqarylyp jatqan jūmystardyń jaı-kúıí talqylandy. Qazírgí uaqytta ǵımarattyń ınjenerlík júıelerí men konstruktsıyalaryn montajdau jalǵasuda, shyny kúmbez ornatylyp jatyr, ekspozıtsıya elementterí men multımedıyalyq ınstallyatsıyalar ázírlenude. Ekspozıtsıyalardyń alǵashqy legí Almatyǵa bekítílgen merzímnen būryn jetkízíldí. Sonymen qatar muzeı kontentín ázírleu boıynsha da belsendí jūmys júrgízílude: fokus-toptar ūıymdastyrylyp, saraptamalyq talqylaular ótude.
Muzeıdíń bolashaq mazmūny da keńeıíp keledí. Baǵyttardyń bírí — balalarǵa qauípsíz mínez-qūlyq daǵdylaryn qalyptastyruǵa arnalǵan bílím beru anımatsıyasy men ınteraktıvtí baǵdarlamalar ázírleu. Būl bullıng jaǵdaılarynda, qūrdastar arasyndaǵy janjalǵa jáne ómírde kezdesetín basqa da qıyndyqtarǵa dūrys árí senímdí áreket etuge úıretuge baǵyttalǵan. Osylaısha muzeı tek ǵylymı-aǵartushylyq emes, sonymen bírge áleumettík mańyzy bar ortalyqqa aınalmaq.
Bolashaq muzeıdíń operatsıyalyq modelí de qalyptastyryluda: íshkí reglamentter, standarttar, rásímder jáne lauazymdyq nūsqaulyqtar ázírleníp jatyr. Qyzmetkerlerdí dayarlau men halyqaralyq tájírıbení zerdeleuge erekshe mán berílude, sonyń íshínde Singapore Science Centre ortalyǵynyń tájírıbesí qarastyryluda. Muzeıdíń ashyluy 2026 jyldyń mausymyna josparlanǵan.
Darhan Satybaldy balalarǵa arnalǵan būl keńístíktíń mazmūny men qūrylysy tolyqtaı balalardyń qajettílíkteríne baǵyttaluy, barlyq sapa jáne qauípsízdík talaptaryna saı boluy kerektígín atap óttí. Almaty ákímí qūrylys barysyna, merzímníń saqtaluyna jáne muzeıdí mazmūnmen tolyqtyruǵa qatań baqylaudy qamtamasyz etudí tapsyrdy. Ol būl nysan eldegí eń úzdík balalar ǵylymı-bílím beru ortalyqtarynyń bírí boluy tıís ekenín aıtty.