Almatyda Balalardy qorǵau kúníne oraı jetí jańa balabaqsha ashylady, – dep habarlaıdy aqshamnews.kz tílshísí.
Halyqaralyq Balalardy qorǵau kúníne oraı Almatyda jalpy syıymdylyǵy 1560 oryn bolatyn jetí jańa balabaqsha paıdalanuǵa beríledí. Jańa nysandar mektepke deıíngí ınfraqūrylymǵa sūranys joǵary audandarda ornalasqan.
Mysaly, Nauryzbaı audanyndaǵy Qūramys shaǵynaudanynda 320 oryndyq zamanauı balabaqsha salyndy. Mektepke deıíngí ūıym ártúrlí jastaǵy 13 topqa arnalǵan, onyń íshínde kíshí, orta, eresek jáne mektepaldy dayarlyq toptary bar.
Ekí qabatty ǵımarat balalardyń tolyqqandy bílím aluy men jaıly boluy úshín qajettí barlyq jabdyqpen qamtylǵan. Nysan qūramynda jatyn bólmeler, bufet, muzyka jáne gımnastıka zaldary, úıírme sabaqtaryna arnalǵan kabınetter, sondaı-aq ákímshílík jáne qyzmettík bólmeler qarastyrylǵan. Aumaqta kóleńkelí shatyrlary bar 13 oıyn alańy men dene shynyqtyru aımaǵy jabdyqtalady.
Qalqaman-2 shaǵynaudanynda 240 oryndyq balabaqsha qūrylysy ayaqtaldy. Balabaqsha 10 topqa arnalǵan jáne balalardy tárbıeleu, oqytu jáne jan-jaqty damytu úshín qolaıly jaǵdaı jasaıtyn zamanauı ınfraqūrylymmen jabdyqtalǵan. Ǵımaratta toptyq jáne oıyn bólmelerí, muzyka zaly men úıírmelerge arnalǵan bólmeler bar.
Shūǵyla shaǵynaudanynda 320 oryndyq balabaqsha salyndy. Nysan alty mektepke deıíngí topty ornalastyruǵa arnalǵan. Ǵımarat bílím beru úderísín jáne tárbıelenushílerdíń jaıly boluyn qamtamasyz etetín úsh funktsıonaldyq bloktan tūrady.
Medeu audanynda 140 oryndyq jáne 8 toptan tūratyn bóbekjaı-balabaqsha paıdalanuǵa beríledí. Túrksíb audanyndaǵy Qaırat shaǵynaudanynda 260 oryndyq, 11 toptan tūratyn bóbekjaı-balabaqsha ashylady. Áuezov audanyndaǵy 10-shaǵynaudanda 160 balaǵa arnalǵan, 8 toptan tūratyn bóbekjaı-balabaqsha salyndy. Osy audannyń Altyn besík shaǵynaudanynda 120 oryndyq, 6 toptan tūratyn bóbekjaı-balabaqsha boı kóterdí. Nysandar qajettí ūıymdastyru jáne rūqsat beru rásímderí ayaqtalǵannan keıín kezeń-kezeńímen paıdalanuǵa beríledí.
Áleumettík ınfraqūrylymdy damytu – Almaty ákímdígí jūmysynyń basym baǵyttarynyń bírí. Qala ákímí Darhan Satybaldy tapsyrmasymen mektepke deıíngí bílím beru salasyndaǵy jobalardy júzege asyru erekshe baqylauda. Qala basshysy áleumettík nysandar qūrylysynyń barysyn únemí tekseríp, merzímníń saqtaluy men jūmystardyń sapasyn jítí qadaǵalap otyr.