Almatyda qoǵamdyq kólik júrgizýshileri úshin qolaıly eńbek jaǵdaıyn jasaýǵa baǵyttalǵan júıeli jumys jalǵasyp keledi. Qalada 20 toqtaý-burylý alańyn (TBA) salý josparlanyp otyr.
Jol ınfraqurylymyn damytý basqarmasynyń málimetinshe, atalǵan alańdar birqatar mańyzdy mindetti atqarady. Atap aıtqanda, avtobýstardyń jol jıeginde májbúrli túrde toqtap turýynyń aldyn alady ári júrgizýshilerdiń tolyqqandy demalýyna qajetti jaǵdaı jasaıdy. Bul óz kezeginde, jolaýshylar tasymalynyń qaýipsizdigin arttyrýǵa yqpal etedi.
Qazir Kóktóbe shaǵynaýdanynda eki marshrýtqa qyzmet kórsetetin, jalpy sany 47 avtobýs shyǵatyn sońǵy núkte retinde paıdalanylatyn toqtaý-burylý alańynyń qurylysy tolyq aıaqtaldy. Alań aýmaǵyna asfáltbeton jabyny tóselip, aýmaq boıyna syrtqy jaryqtandyrý ornatylǵan. Sonymen qatar jalpy aýmaǵy 49 sharshy metr bolatyn tamaqtaný aımaǵy men sanıtarlyq-gıgıenalyq bólmesi bar júrgizýshilerge arnalǵan modýldik demalys ǵımaraty boı kóteredi.
Qalanyń ártúrli aýdandarynda bıyl paıdalanýǵa beriletin taǵy úsh toqtaý-burylý alańynyń qurylysy júrgizilip jatyr. Al qalǵan 16 alań boıynsha jobalyq-smetalyq qujattamany ázirleý qolǵa alynǵan.