Ásírese, qūrylys salasy men kómírdí paıdalanu máselesíne basa nazar audaryldy, – dep habarlaıdy aqshamnews.kz tílshísí.
Almaty ákímí Darhan Satybaldy tóraǵalyq etken ekologıya máselelerí jóníndegí vedomstvoaralyq keńeste qorshaǵan ortaǵa túsetín júktemení azaıtuǵa baǵyttalǵan naqty sharalar toptamasy qaraldy.
Keńes barysynda Almatydaǵy aua sapasy álí de ózektí problema ekení aıtylyp, ony sheshu úshín júıelí árí ūzaq merzímdí, ózara úılestírílgen qadamdar qajet ekení atap ótíldí. Osyǵan baılanysty qūrylys qaldyqtaryn basqarudy tártípke keltíru jáne ekologıyalyq talaptardyń oryndaluyna baqylaudy kúsheıtu míndetí qoıyldy.
Atap aıtqanda, Almaty oblysynda qūrylys qaldyqtaryn jınau men óńdeuge arnalǵan arnaıy ınfraqūrylym qalyptastyru josparlanuda. Būl qadam qaldyqtardy retsíz tógudíń aldyn alyp, qorshaǵan ortaǵa túsetín salmaqty azaıtuǵa múmkíndík beredí, Sonymen qatar qūrylys salasyn tolyq tsıfrlandyru kózdelíp otyr, būl ashyqtyqty arttyryp, baqylau tetíkterín tıímdí etedí.
Qūrylys alańdaryndaǵy ekologıyalyq tártíp te nazardan tys qalmady. Míndettí talaptardyń qatarynda aumaqtardy júıelí túrde suaru jáne shańnyń paıda boluyn azaıtatyn sharalardy qoldanu bar. Būl qūrylys sektorynyń aua lastanuyna qosatyn úlesín tómendetuge múmkíndík beredí.
Qalada kómírdí paıdalanu máselesí de jeke qarastyryldy. Auaǵa zıyandy shyǵaryndylardy azaıtu maqsatynda kómírdíń qalaǵa jetkízíluín shekteu tetíkterí talqylanuda. Sonyń íshínde kómírdí satu oryndaryn qala aumaǵynan tys jerlerge kóshíru jáne ony paıdalanudy qysqartu múmkíndígí qarastyrylyp jatyr.
Qabyldanǵan jáne qarastyrylyp jatqan sharalar auanyń lastanu deńgeıín kezeń-kezeńímen tómendetuge, qalanyń ekologıyalyq jaǵdaıyn jaqsartuǵa jáne Almatyda qaldyqtar men otyn resurstaryn basqarudyń tıímdí júıesín qalyptastyruǵa baǵyttalǵan.