Alatau qalasynda ınvestorlarǵa beríletín jer telímderí tek naqty ınvestıtsıyalyq jobalardy júzege asyru úshín ǵana ūsynylady. Eger ınvestor ekí jyl íshínde óz míndettemesín oryndamasa, oǵan aıyppūl salynyp, joba taǵy ekí jylda júzege aspasa, jer memleketke qaıtarylady, dep habarlaıdy Aqshamnews.kz tílshísí.
Premer-mınıstrdíń orynbasary Qanat Bozymbaev Parlament palatalarynyń bírlesken otyrysynda Alatau qalasyndaǵy jer qatynastary arnaıy rejımmen retteletínín málímdedí.
Onyń aıtuynsha, qala aumaǵynda arnaıy jer qory qalyptastyrylady. Būl qor strategıyalyq jáne ınvestıtsıyalyq jobalardy íske asyrudyń mańyzdy qūralyna aınalyp, óńírdíń damuy men ekonomıkalyq ósímíne serpín bermek.
Qanat Bozymbaevtyń sózínshe, ınvestorlarǵa jer uchaskelerí bıznes-lıtsenzıya nemese kelísímshart negízínde beríledí. Alaıda mūndaı telímder tek naqty ınvestıtsıyalyq míndettemelermen baılanystyrylady.
Vıtse-premer jer máselesí qoǵam úshín árdaıym ózektí ekenín atap óttí. Osyǵan baılanysty Alatau qalasynda, sonyń íshínde sheteldík ınvestorlarǵa da, jer tek belgílí bír ınvestıtsıyalyq jobalardy júzege asyru úshín ǵana ūsynylady.
Ol jer telímderí jalǵa beru nemese ózge de zańdy tetíkter arqyly rásímdeletínín jetkízdí. Sonymen qatar ınvestorlarǵa naqty talaptar qoıylyp, olardy oryndauǵa belgílí bír merzím beríledí.
Eger ınvestor ekí jyl íshínde ózíne júktelgen míndettemelerdí oryndamasa, mysaly zauyt, fabrıka, unıversıtet nemese qonaqúı sekíldí nysandardy salu jūmystaryn bastamasa, oǵan aıyppūl salynady. Al odan keıíngí ekí jyl íshínde joba tolyqqandy damytylmasa, jer uchaskesí memleket menshígíne qaıtarylady.
Qanat Bozymbaev jer telímderí tek ınvestıtsıyalyq jáne ískerlík maqsatta paıdalanylatynyn aıtty. Al Qazaqstan azamattaryna qatysty jer qatynastary qoldanystaǵy zańnama ayasynda rettele beredí.