Óńírlík kommunıkatsıyalar qyzmetínde ótken brıfıngte qalalyq Qorǵanys ísterí jóníndegí departamenttíń bastyǵy, polkovnık Jaqsylyq Aıtbaev áskerge shaqyru nauqany kezíndegí zańnamany saqtau máselesíne baılanysty qoıǵan almatylyq jurnalısterdíń sūraǵyna jauap berdí, – dep habarlaıdy aqshamnews.kz tílshísí.
Onyń aıtuynsha, qoldanystaǵy zańnama shaqyrylushylarǵa da, jūmys berushílerge de bírdeı jauapkershílík júkteıdí, sondaı-aq áskerı qyzmetke qatysty máselelerdí «beıresmı» jolmen sheshuge tolyq tyıym salynǵan.
Spıker áskerge barudy keıínge qaldyryp nemese «aq bılet» alyp berudí ūsynatyn áskerı komıssarıattaǵy «kómekshíler» turaly da aıtyp óttí.
«Áskerı qyzmettí keıínge qaldyrudy, míndetínen bosatudy zań boıynsha shaqyru komıssıyasy ǵana sheshedí. Oǵan deldal kerek emes. Jalǵan dárígerlík anyqtama alyp, auru degen dıagnoz qoıyp, áskerı qyzmetten jaltarudyń basqa da zańsyz jolyn oılap tabu deldalǵa da, áskerge shaqyrylǵan adamǵa da qylmystyq jauapkershílík júkteıdí», – deıdí Jaqsylyq Aıtbaev.
Áskerge barudan jaltarǵandardyń jauapqa tartylatynyn eske saldy.
«Zańdy negízí bolmaǵan jaǵdaıda áskerge shaqyrudan jaltaru aıyppūl arqalap, eńbekpen túzeu jūmysyna ne bír jylǵa deıín bas bostandyǵyn shekteuge nemese aıyruǵa ákep soǵady. Jazasyn auyrlatar basqa da sebep bolǵan jaǵdaıda jaza jaǵy odan da qatań boluy múmkín», – deıdí spıker.
Jūmys berushíler úshín de jauapkershílík qarastyrylǵan. Ūıym basshylary áskerı esepte tūratyn jáne áskerge shaqyrylatyn qyzmetkerler turaly málímettí der kezínde ūsynuǵa míndettí.
«Mūndaı derektí áskerı organdarǵa uaqytyly nemese múldem ūsynbasa 10-nan 40 aılyq eseptík kórsetkíshke deıín aıyppūl salady», – dep tolyqtyrdy.
Qorytyndylaı kele, Qorǵanys ísterí jóníndegí departamentte áskerge shaqyruǵa qatysty barlyq másele zańmen belgílengen tártípte, onyń íshínde elektrondyq úkímet portaly arqyly sheshíletínín atap ótíp, azamattardy zańnyń talaptaryn saqtap, kúmándí shemalarǵa qatyspauǵa shaqyrdy.