Búgin Almatynyń Jambyl atyndaǵy qalalyq kitaphanasynda jańa American Space Makerspace bilim berý ortalyǵynyń saltanatty ashylýy ótti. Ortalyq AQSH elshiligi men Almatydaǵy AQSH Bas konsýldyǵynyń qoldaýymen iske qosyldy, - dep habarlaıdy aqshamnews.kz tilshisi.
Ashylý rásimine AQSH-tyń Almatydaǵy Bas konsýly Mıshel Erkın, Qazaqstan Jazýshylar odaǵynyń tóraǵasy Mereke Qulkenov, Almaty qalasy Mádenıet basqarmasynyń basshysy Danıar Álıev, mádenıet jáne óner qaıratkerleri, sondaı-aq buqaralyq aqparat quraldarynyń ókilderi qatysty. Sonymen qatar is-sharaǵa Amerıka–Qazaqstan birlesken munaı kompanıasy – «Teńizshevroıldyń» ókilderi de keldi.
Jańa ortalyq jastarǵa arnalǵan ashyq bilim alańy retinde jumys isteıdi. Munda AQSH ýnıversıtetterinde oqýdy josparlap júrgen talapkerlerge keńes berý, aǵylshyn tili kýrstary, sondaı-aq kóshbasshylyq pen shyǵarmashylyqty damytýǵa baǵyttalǵan baǵdarlamalar júzege asyrylady.
İs-shara barysynda sóz sóılegen Qazaqstan Jazýshylar odaǵynyń tóraǵasy Mereke Qulkenov eki el arasyndaǵy mádenı jáne ádebı baılanystyń mańyzyn atap ótti.
"El men eldi jaqyndastyratyn eń qýatty rýhanı kópir – ádebıet. Ókinishke qaraı, táýelsizdik alǵan otyz jyldan astam ýaqyt ishinde Qazaqstanǵa amerıkalyq jazýshylardyń kelýi óte sırek boldy. Ádebıet – saıasat ta emes, bıznes te emes, ol halyqtardy bir-birimen baılanystyratyn sala. Almatyda osyndaı ortalyqtyń ashylýy Qazaqstan men AQSH arasyndaǵy ádebı baılanystardyń jandanýyna serpin berse deımiz. Biz elimizde qazirgi amerıkalyq ádebıettiń ókilderin kórgimiz keledi. Sonymen qatar aǵylshyn tilinen qazaq tiline tikeleı aýdarma jasaıtyn shyǵarmashylyq ortalyqtardyń kóbeıgenin qalaımyz", – dedi ol.
Uıymdastyrýshylardyń aıtýynsha, American Space Makerspace aldaǵy ýaqytta jastardyń halyqaralyq bilim keńistigine shyǵýyna, sondaı-aq mádenı jáne zıatkerlik almasýǵa jol ashatyn mańyzdy ortalyqtardyń birine aınalmaq.