Almatyda IV Almaty Circus Festival halyqaralyq tsırk ónerí festıvalí máresíne jettí. Būl Qazaq memlekettík tsırkíníń manejínde álemníń ár elínen kelgen úzdík tsırk artısterín toǵystyrǵan jyldyń eń aıtuly mádenı mádenı oqıǵalarynyń bírí boldy. Bírneshe kún boıy kórermender zamanauı tsırk óneríníń bıík deńgeıín aıshyqtaǵan bíregeı qoıylymdardy, kúrdelí tryukter men tūsaukeser nómírlerdí tamashalady.
Ótken jyldar íshínde Almaty Circus Festival manej sheberlerí, jas daryndar, jetekshí tsırk ūıymdarynyń basshylary, prodyuserler men bedeldí halyqaralyq festıvalderdíń ūıymdastyrushylary toǵysatyn bedeldí halyqaralyq alańǵa aınaldy. Búgínde festıval álemdík tsırk óneríníń mańyzdy forumdarynyń qatarynan oıyp tūryp oryn alyp, artısterge kásíbı tūrǵydan damuǵa, halyqaralyq yntymaqtastyqty nyǵaıtuǵa jańa múmkíndíkter ashyp keledí.
Baıqau baǵdarlamasyna álemdík tsırk óneríníń tanymal qaıratkerlerí, írí tsırk ūıymdary, halyqaralyq festıvalder men prodyuserlík kompanıyalardyń jetekshílerí engen halyqaralyq qazylar alqasy tórelík ettí.
Festıvaldíń eń joǵary marapaty – Bas júlde Qytaıdyń Hebei Wuqiao Acrobatic Arts School óner mektebíníń artısterí Chjan Hao men Lı Tyan Men oryndaǵan «Double Wire Act» («Erkín sym – kerílgen arqan») nómíríne būıyrdy. Qos ónerpazdyń joǵary tehnıkalyq sheberlígí, tepe-teńdíktí mínsíz saqtaı bíluí, asa kúrdelí tryukterdí oryndaudaǵy kásíbılígí men kórkemdík sheshímí qazylar alqasynyń joǵary baǵasyna ıe bolyp, baıqaudyń sharyqtau shegíne aınaldy.
Altyn júldege Frantsıyadan kelgen Turbelın Mateo Antuan men Savarı Elıyanyń jūptyq dıabolo ónerín pash etken «Venus» nómírí, Mońǵolıyanyń Urangoo Chınbatar jetekshílík etetín «Selenge» truppasy, sondaı-aq Belarus memlekettík tsırkíníń trapetsıyadaǵy áue gımnastary Egor men Anastasıya Kovalenkonyń «Legend» nómírí laıyq dep tanyldy.
Kúmís júlde Vengrıyanyń Kriko duetíne (Zoı Krıvanek pen Bentse Kollar) áue beldíkteríndegí sheber ónerí úshín, Reseılík artıst Olga Rojkovskayanyń «Áue arqany» nómíríne jáne Shveıtsarıyanyń Janine & Fabien duetí oryndaǵan áue adajıosyna tabystaldy.
Qola júldení Ózbekstannyń Sky Angels «Infinity Aliyeva» ūjymy, Ukraına men Armenıya atynan óner kórsetken jongler Davıd Emıshyan, sondaı-aq Nadejda Efımenko jetekshílík etetín Shymkent tsırkíníń «Aspan arulary» áue gımnastary ıeleníp, Qazaqstannyń abyroıyn asqaqtatty.
Festıvaldíń jabylu saltanatynda halyqaralyq qazylar alqasynyń arnaıy syılyqtary dástúrlí túrde tabystaldy. Būl marapattar kóptegen ónerpaz úshín álemníń jetekshí tsırk arenalaryna, aıtuly halyqaralyq festıvalderge jol ashyp, jańa shyǵarmashylyq jobalarǵa qatysuǵa múmkíndík beredí.
IV halyqaralyq Almaty Circus Festival Almatynyń zamanauı tsırk óneríníń halyqaralyq ortalyqtarynyń bírí retíndegí joǵary mártebesín taǵy bír márte aıqyndady. Qatysushylar úshín būl festıval kásíbı sheberlík básekesí ǵana emes, álemdík deńgeıdegí festıvalderge shaqyrtu alyp, halyqaralyq kelísímsharttar jasauǵa jáne tsırk ındustrıyasynyń jetekshí ókílderíne ónerín tanytuǵa múmkíndík bergen mańyzdy shyǵarmashylyq alań boldy.
Festıval taǵy bír márte tsırk óneríníń tílí eshqandaı audarmany qajet etpeıtín ámbebap óner ekenín dáleldedí. Batyldyq pen talant, adam múmkíndígíníń sheksízdígí men ísíne degen adaldyq álemníń ár qıyrynan kelgen artısterdí bír manejde toǵystyryp, kórermenge ūmytylmas áser men álemdík tsırk óneríníń shynaıy merekesín syılady. Qazírdíń ózínde IV Almaty Circus Festival Qazaqstannyń mádenı ómíríndegí eń jarqyn oqıǵalardyń bíríne aınalyp, otandyq tsırk óneríníń halyqaralyq bedelín arttyru jolyndaǵy mańyzdy beles bolǵanyn nyq senímmen aıtuǵa bolady.
Eske sala keteıík, IV halyqaralyq Almaty Circus Festival festıvalíníń merekelík gala-kontsertí 23 tamyzǵa deıín jalǵasady. Almaty tūrǵyndary men qala qonaqtary álemníń jetekshí tsırk artısterí oryndauyndaǵy bíregeı qoıylymdardy, tańǵajaıyp tryukterdí jáne festıvaldíń úzdík nómírlerín tamashalaı alady.