Jyl basynan berí Eńbek mobıldílígí ortalyǵyna 54 044 adam júgíngen, dep habarlaıdy aqshamnews.kz tílshísí.
Almatyda halyqty jūmyspen qamtuǵa baǵyttalǵan sharalar jalǵasyp keledí. Bıylǵy jyldyń ekínshí toqsanynyń qorytyndysy boıynsha qaladaǵy jūmys kúshí 1 mln 217,5 myń adamǵa jettí. Būl ótken jyldyń osy kezeńímen salystyrǵanda 43 myń adamǵa kóp. Būl turaly Almaty qalasynyń Jūmyspen qamtu jáne áleumettík baǵdarlamalar basqarmasynyń ókílderí aıtty.
Jūmyspen qamtylǵan halyq sany 1 mln 164 myń adamǵa jettí. Būl bír jyl būrynǵy kórsetkíshten 41,7 myń adamǵa kóp. Almatydaǵy jūmyssyzdyq deńgeıí 4,4% bolyp, respublıkalyq kórsetkíshten tómen deńgeıde saqtaldy.
Jyl basynan berí Eńbek mobıldílígí ortalyǵyna 54 044 adam júgíngen. Onyń 43 942-sí jūmyssyz retínde tírkeldí. Jalpy 42 766 adam jūmyspen qamtuǵa járdemdesu sharalaryna qatysty.
Onyń íshínde 8 755 almatylyq tūraqty jūmysqa ornalasty. Sonymen qatar 5 613 adam subsıdıyalanatyn jūmys oryndaryna joldama aldy. Atap aıtqanda, 4 150 adam qoǵamdyq jūmystarǵa, 614 adam «Kúmís jas» jobasyna, 362 adam «Altyn jas» jobasyna qatysty. Taǵy 305 adam áleumettík jūmys oryndaryna ornalassa, 182 adam jastar praktıkasyna jíberíldí.
Kásíptík oqytu men bílíktílíktí arttyruǵa erekshe nazar audarylyp otyr. Bıyl 538 adam kásíptík oqudan óttí, onyń 451-í jūmys ornynda bílím aldy. «Bastau Bıznes» jobasy ayasynda 1 538 adam oqudan ótse, taǵy 2 215 adam enbek.kz platformasy arqyly jańa daǵdylardy meńgerdí. Kásíptík baǵdar beru sharalarymen 23 922 adam qamtyldy.
Kásíp bastauǵa nıettí azamattarǵa da qoldau kórsetíledí. Bıyl 400 AEK, yaǵnı 1,73 mln teńgege deıíngí qaıtarymsyz grant 165 adamǵa beríldí. Granttardyń jalpy somasy 285,1 mln teńge.
2026 jyly Almatyda 51 270 jūmys ornyn qūru josparlanǵan, onyń 45 399-y tūraqty jūmys orny. 1 qyrkúıektegí jaǵdaı boıynsha qalada 53 026 jūmys orny qūryldy. Būl jyldyq jospardyń 103,4%-y bolady. Onyń íshínde 47 441-í – tūraqty jūmys orny, būl josparlanǵan kórsetkíshtíń 104,5%-yna teń. Sonyń íshínde 8 775 adam bos jūmys oryndaryna ornalastyryldy.