Almatyda qalyń qardan keıín kóshelerdí úzdíksíz tazalau jūmystary jalǵasyp jatyr.
Qar 16 qańtar kúní tańerteń bastalyp, «Qazgıdromet» RMK boljamyna sáıkes, bírde toqtap, bírde jauyp 18 qańtardyń tańyna deıín jalǵasady. 17 qańtar saǵat 08:00-degí jaǵdaı boıynsha qalaǵa 15 sm-den astam qar tústí. Būl turaly Almaty qalasynyń Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí aıtty.
Meteorologıyalyq stantsıyalardyń deregíne sáıkes, qar jamylǵysynyń bıíktígí mynadaı: Avıatsıyalyq meteostantsıya «Áuejaıda» — 11 sm, «Kamensk ústírtí» meteostantsıyasynda — 38 sm, «Shymbūlaq» meteostantsıyasynda — 49 sm. Kommunaldyq qyzmet qar jaua bastaǵan sátten bastap kúsheıtílgen táulík boıy jūmys rejımíne kóshken. Jūmystarǵa 2,8 myńnan astam jol salasy jūmysshysy jáne 1 250 bírlík arnaıy tehnıka jūmyldyrylǵan.
Qozǵalys qauípsízdígín qamtamasyz etu úshín 75 jedel brıgada jūmys ístep, yldı, dóń jáne jolaıyryqtarǵa kóktaıǵaqqa qarsy qospa sebílgen. Qar bastalǵanǵa deıín jolǵa aldyn ala kóktaıǵaqqa qarsy reagentter jáne arnaıy qospalar sebíldí. Būl qar qalyń jaǵdaıda da mūz qatpaı, kólíktíń tepe-teńdígín saqtauǵa múmkíndík berdí. Keıbír uchaskede qardyń jınaluy ūzaqqa sozylǵan jauyn-shashyn men temperaturanyń auytquyna baılanysty, sonyń saldarynan qardyń eríp-qatu úderísí júrgen.
Shaǵyn kólemdí arnaıy tehnıka trotuarlar men qoǵamdyq keńístíkterdí tehnıka kómegímen tazartyp jatyr, al qoǵamdyq kólík ayaldamalary, jerústí ótkelderí, baspaldaqtar men pandustar qolmen tazalanuda. Túngí uaqytta ekí kezeńmen qar syryp tazalau júrgízílíp, jappaı qar shyǵaru ūıymdastyryldy. Qalanyń negízgí magıstraldary men qoǵamdyq aumaqtarynan 3 myń tekshe metrden astam qar shyǵaryldy. Tazalau kezínde qoǵamdyq kólík baǵyttaryna, medıtsınalyq jáne bílím beru nysandaryna kíreberísterge, sondaı-aq júrgínshíler qozǵalysy qarqyndy uchaskelerge basymdyq beríledí. Kezekshí brıgadalar joldyń jaı-kúıín táulík boıy baqylap, qajet bolǵan jaǵdaıda eń kúrdelí baǵyttarda jūmystardy jedel kúsheıtedí.
Qalalyq qyzmet júrgízushílerden múmkíndígínshe kólígín jol jıegínde qaldyrmaudy jáne arnaıy tehnıkanyń qozǵalysyna kedergí keltírmeudí sūraıdy. Tūrǵyndardyń qoldauy kóshelerde qauípsíz árí jaıly qozǵalysty tezírek qamtamasyz etuge múmkíndík beredí. Jaǵdaı jauapty bólímshelerdíń tūraqty baqylauynda, būl jūmys qala qardan tolyq tazarǵanǵa deıín jalǵasady.