Jańa soft medısınada erekshe mańyzdy
Almaty qalalyq jedel shuǵyl kómek kórsetý aýrýhanasynda ıshemıalyq jáne gemorragıalyq ınsýlttyń últra dál dıagnostıkasy úshin neıroradıologıa salasyndaǵy jasandy ıntellekt CEREBRA engizildi, dep habarlaıdy Almaty-akshamy.kz.
Osy ýaqytqa deıin pasıentterge MRT arqyly dıagnoz qoıylǵan, biraq adamnyń kózi KT sýretinde paıda bolǵan sıtotoksıkalyq isinýdi baıqaı almaıdy. Onyń ústine, dáriger ınsýlt dıagnozyn sımptomdar oryn alǵannan bastap 6 saǵattan keıin qoıa alady. Al ınsýlttiń terapevtik terezesi 4,5 saǵatty quraıdy. Jasandy ıntellekt CEREBRA kómegimen ınsýlt 10 mınýt ishinde tanylady, sonymen qatar ol mıdyń zaqymdanbaǵan parenhımasynyń bóligimen salystyrý arqyly ıadrodaǵy tinderdiń tyǵyzdyǵynyń ózgerýin naqtylaýǵa múmkindik beredi. Nátıjesinde pasıentke jedel emdeý taǵaıyndalyp, fýnksıany joǵaltý jáne nevrologıalyq tapshylyq qaýpi azaıady.
Jańa soft medısınada erekshe mańyzdy. Sebebi ınsýlt Qazaqstandaǵy ólimniń negizgi sebepteriniń biri bolyp tabylady, jylyna qyryq myńǵa deıin ınsýlt tirkelse, onyń jartysy ólimge, al 80%-y múgedektikke ákeledi. Sondaı-aq, Qazaqstan ınsýlt aýrýy boıynsha alǵashqy 30 eldiń qataryna kiredi. Almaty qalalyq jedel shuǵyl kómek kórsetý aýrýhanasy jylyna ınsýltpen myń naýqasty qabyldaıdy.
CEREBRA jobasyn AlmatyA.I.Lab laboratorıasynyń jas qazaqstandyq mamandary oılap tapty. Olar 2018 jyldan bastap jasandy ıntellekt tehnologıalaryn damytýmen aınalysyp kele jatyr. Barlyq ázirleýshiler RFMM, SDÝ, QBTÝ, Nazarbaev Ýnıversıteti, Máskeý memlekettik ýnıversıteti, brıtandyq jetekshi ýnıversıtetter túlekteri.
«Komanda jas, bolashaǵy zor, kreatıvti, onyń quramynda baǵdarlamashylar, matematık, fızık, neırodadıologtar bar. Biz baǵdarlamalyq jasaqtamany 3 jyl boıy muqıat jasadyq. Otandyq aýrýhanalardan KT derekteriniń arhıvin suradyq, al eń birinshi bolyp Almaty qalalyq jedel shuǵyl kómek kórsetý aýrýhanasynyń bas dárigeri Almaz Djývashev jaýap berip, bizge qoldaý kórsetti. Jalpy, bul málimettermen elimizde problema bar, óıtkeni olardy taldaýǵa arnalǵan KT derekqory joq, sondyqtan biz jasandy ıntellekti synaý úshin bárin birtindep jınadyq. Ózimizdiń ónertabysymyzben biz aýrýhanaǵa ýaqytynda baryp, naqty dıagnoz qoıylǵan jaǵdaıda ınsýlttiń emdeletinin, mıdy zaqymdanýdan saqtaýǵa bolatynyn dáleldegimiz keledi. Mıdyń ózgerý nátıjeleri boıynsha aqparatty avtomatty túrde beretin Cerebra mobıldi qosymshasyn paıdalanyp, biz ýaqytty barynsha únemdeımiz, ári barlyq emdeýshi top bir jelide bolyp, keńes bere alady, - deıdi joba menedjeri Merýert Saıfýllaqyzy.
Jasandy ıntellekt kómegimen dıagnoz qalaı qoıylady? KT sýretin alǵannan keıin baǵdarlama mıdyń 3D modelin jasaıdy, sodan keıin neırondyq jeli olardy óńdeıdi jáne nátıjeni mıdyń zaqymdanǵan aımaqtaryn kórsetetin analıtıkalyq esep túrinde beredi. Bul birneshe mınýt ýaqytty alady. Al ınsýlt kezinde time is brain «ýaqyt degen mı» - ýaqyt óte mańyzdy.
Búgingi kúni CEREBRA ınsýlttiń 85%-ynda durys dıagnoz qoıýǵa kómektesedi, sondyqtan ázirleýshiler qosymsha málimetter jınaý arqyly ony jetildire beredi. Almaty qalalyq jedel shuǵyl kómek kórsetý aýrýhanasy jáne basqa aýrýhanalar bul proseste jaqsy kómek bolady. Al eń bastysy, naýqastar dálirek dıagnostıkadan ótip, olardyń saýyǵý múmkindigi artady.