Almaty metropolıteníníń batys baǵyttaǵy qūrylysy qarqyn aldy. "B.Momyshūly" stantsıyasynan "Qalqaman" stantsıyasyna deıíngí tunneldí būrǵylau jūmystary merzímínen būryn ayaqtaldy. Ekí stantsıya arasyndaǵy ūzyndyǵy 1593 metr bolatyn tunnelde túıístíru jūmystary tolyq oryndaldy.
Jobadaǵy bas merdíger – BCN Group ("Bazis Construction") kompanıyasynyń būrǵylau brıgadasy sońǵy metrdí eńseríp, tunnelderdíń arasyn jalǵady. "Aıman" atty mehanıkalandyrylǵan qalqan sońǵy topyraq qabatyn būzyp, arnaıy demontaj kamerasyna kírdí. Qazír joldyń ústíńgí qūrylymyn tóseu jūmystary qatar júrgízílude.
Sol jaq tunnel de merzímínen būryn tapsyrylǵan. Onda relster, baılanys jelílerí, órt sóndíru jáne beınebaqylau júıelerí tolyq ornatylǵan.
Bas merdíger ókílí Mūrat Úkshebaevtyń aıtuynsha, mamandar táulígíne 4–5 metrge deıín ílgerílep, rekordtyq kórsetkíshke qol jetkízgen. Keı uchaskelerde dıametrí 2–3 metr bolatyn írí tastar jūmys barysyn qıyndatqan.
"Búgín bízdíń úshín tarıhı kún – bíz tonnelderdí bíríktírdík. Endí barlyq tonneldík jūmystar tolyq ayaqtaldy dep senímdí túrde aıtuǵa bolady. Jalpy ūzyndyǵy – 3,5 shaqyrymǵa juyq. Sol jaq aıdau tunnelínde bíz joldyń joǵarǵy qūrylymyn tóseudí 100% ayaqtadyq. Aldaǵy uaqytta qalqandy jer betíne shyǵaryp, tonneldíń íshkí qaptamasyn tolyqtyramyz jáne jol ústíńgí qūrylysynyń uklauyn bastaımyz. Qazír shamamen 1 shaqyrym jol qaldy, ony relstermen jabu qajet. Daıyn bólíkte shamamen 500 metr rels ornattyq, al jańa ótken uchaskede – taǵy 1 shaqyrym. Mamyr aıyna deıín jol ústíńgí qūrylysynyń tolyq montajy jáne tūraqty elektrmen jabdyqtau kabelderíníń ornatyluy josparlanuda. Al mausym aıyna qaraı barlyq qūrylys-montaj jūmystary bítedí, sodan keıín íske qosu ,jóndeu jūmystary bastalady. Būl – óte jauapty jáne qatań reglamentke saı protsess. Aldyn ala esepke sáıkes kún saıyn jolaushylar sany 180 000 adamǵa kóbeıetín bolady. Qala tūrǵyndary úshín būl óte mańyzdy oqıǵa", - dedí ol.
Qazír "Qalqaman" stantsıyasynyń ǵımaraty tolyq salynyp bíttí. Qūrylysqa 32,8 myń tekshe metr beton jūmsalǵan. Qazír árleu jūmystary ayaqtaluǵa jaqyn, ınjenerlík jelíler de tartylǵan. Stantsıyada tórt kíreberís qarastyrylǵan, avtomatty esíkter, tólem júıelerí, eskalatorlar men múmkíndígí shekteulí jandarǵa arnalǵan lıftíler ornatylady.
Al metro salasynda 35 jyl tájírıbesí bar, tonnel jūmystary brıgadırí Sabıt Bolatūly brıgada táulík boıy jūmys ístegenín aıtty.
"Bízdíń brıgadanyń kúsh-jígerímen búgín bíz oń jaq peregondy tonneldí bíríktíríp, jūmysty ayaqtadyq. Mamyr aıynda kírístík, aqpan aıynda tonneldí tolyq ótíp shyqtyq. Brıgadalar táulík boıy, 24 saǵat jūmys ístedí. Brıgadanyń qūramynda 50 adam boldy. Jūmysty Kalkaman stansasynan Yasauı kóshesíne qaraı júrgízdík. "Aıman" atty tehnıkamen sol jaq tonneldí ótíp, oń jaq tonnelge jettík – 1,5 shaqyrym jol júrdík. Úlken tastar kezdestí, olardy arnaıy qūraldarmen būzdyq. Barlyq komanda músheleríníń úılesímdí jūmysy arqasynda osy uchaskeden sáttí óttík. Būl – bízdíń bírínshí jūmysymyz emes. Osy bólímdí ayaqtaǵannan keıín Altyn-Orda jáne Barlyqqa qaraı jūmysymyzdy jalǵastyruǵa daıynbyz. Barlyq resurstar men mamandarymyz tolyq daıyn", - deıdí ol.
Ortalyq dıspetcherlík punkt barlyq qauípsízdík jáne tírshílíktí qamtamasyz etu júıelerín basqarady. Sonymen qatar, seısmıkalyq belsendí aımaq bolǵandyqtan, 120 datchık ornatylyp, temírbeton konstruktsıyalardyń jaǵdaıy onlaın rejımde baqylanady.
Qūrylys-jóndeu jūmystary 2026 jyldyń bírínshí jartyjyldyǵynyń sońynda ayaqtalyp, stantsıya íske qosu-retteu jūmystaryna beríledí.
Kompanıya aldaǵy uaqytta "Qalqamannan" "Barlyq" stantsıyasyna deıíngí jańa jelíní de qysqa merzímde saluǵa daıyn ekenín málímdedí. Joba ayasynda úsh jańa stantsıya men jalpy ūzyndyǵy 4,2 shaqyrym tonnel qūrylysy qarastyrylǵan. Jalpy jelí ūzyndyǵy stantsıyalarmen qosa eseptegende 5,274 shaqyrym bolady.
Qūrylys qarqyny shahar basshysy júktegen míndetterge saı júrgízílíp otyr. Osylaısha, Almaty metrosynyń batys baǵyttaǵy keńeyuí qala ınfraqūrylymyn damytuǵa jáne tūrǵyndardyń kólík qoljetímdílígín arttyruǵa serpín bermek.
