Almaty kolledjderí pedagogteríníń komandasy respublıkalyq spartakıadada baq synauda, – dep habarlaıdy aqshamnews.kz tílshísí.
Shymkent qalasynda elímízdíń kolledj oqytushylary men qyzmetkerlerín bíríktírgen auqymdy jarys bastaldy. Būl dodada Almaty qalasynyń namysyn tájírıbelí pedagogter komandasy qorǵauda.
1–6 mausym aralyǵynda Shymkent qalasynda tehnıkalyq jáne kásíptík bílím beru ūıymdarynyń pedagogterí men qyzmetkerlerí arasynda respublıkalyq spartakıada ótude. Atalǵan sporttyq ís-sharany Qazaqstan Respublıkasy Oqu-aǵartu mınıstrlígí, «TALAP» kommertsıyalyq emes aktsıonerlík qoǵamy jáne Túrkístan oblysynyń bílím basqarmasy ūıymdastyrǵan. Jarystyń negízgí alańy retínde Túrkístan joǵary kópsalaly agrarlyq kolledjí tańdaldy.
Spartakıada ekí kezeńnen tūrady. Aımaqtyq íríkteu jarystary 30 mamyrda ayaqtalyp, olardyń qorytyndysy boıynsha úzdík komandalar respublıkalyq fınalda bas qosty. Baǵdarlamaǵa sporttyń toǵyz túrí engízílgen. Atap aıtqanda, shaǵyn futbol, erler men áıelder arasyndaǵy voleıbol, basketbol, ústel tennısí, toǵyzqūmalaq, asyq atu, bes asyq jáne arqan tartu boıynsha saıystar ótude.
Saltanatty ashylu rásímí joǵary deńgeıde ūıymdastyrylyp, odan keıín qatysushylar alǵashqy jarystarǵa kírístí. Komandalar arqan tartuda kúsh-qaıratyn, al ūlttyq zıyatkerlík oıyn – toǵyzqūmalaqta sheberlígí men taktıkalyq daıyndyǵyn kórsettí.
Spartakıadaǵa qatysyp jatqan Almaty qalasynyń delegatsıyasyna erekshe nazar audaryluda. Megapolıstíń abyroıyn qorǵaıtyn komandanyń qūramynda Almaty memlekettík bıznes kolledjíníń dırektory Ashat Janbosynov ta bar. Ol jarysqa qatysushylarǵa qoldau bíldíríp, tuǵan qalanyń namysyn laıyqty qorǵauǵa tílektestík bíldírdí.
Jarys erejesíne sáıkes, qatysushylar kolledjderdíń shtattaǵy qyzmetkerlerí boluy jáne olardyń pedagogıkalyq júktemesí kemínde 720 saǵatty qūrauy tıís. Sondaı-aq barlyq sportshylardyń jasy 20-dan joǵary boluy qajet. Komandalyq sport túrlerínde 40 jáne 45 jastan asqan oıynshylardyń qatysuy míndettí shart retínde belgílengen.
Spartakıada jeńímpazdary men júldegerlerí ūıymdastyrushylar atynan kuboktarmen, medaldarmen jáne dıplomdarmen marapattalady.
Alda qatysushylardy tartysty árí jauapty jarys kúnderí kútíp tūr. Būl doda tehnıkalyq jáne kásíptík bílím beru júıesíníń pedagogterí men qyzmetkerlerí tek sapaly bílím beríp qana qoımaı, sport alańynda da tabandylyq pen jeńíske degen jígerdíń úlgísín kórsete alatynyn dáleldeıdí.