Óńírlík kommunıkatsıyalar qyzmetí alańynda ótken baspasóz konferentsıyasynda Almaty qalasy Sport basqarmasynyń basshysy Darhan Nūrhanūly osylaı dep málímdedí. Ol joǵary jetístíkter sportyn damytyp, kásíbı sportshylardy dayarlau úshín qandaı jaǵdaı jasalyp jatqanyn aıtty.
2022 jyldan berí Almatyda Sport basqarmasyna qarasty barlyq ūıymdy sport jabdyqtarymen qamtıtyn júıelí baǵdarlama júzege asa bastaǵan.
Spıkerdíń aıtuynsha, byltyr osyǵan 1 mlrd teńge bólíníptí. Sonyń arqasynda sport mektepterí, dayarlau ortalyqtary men ózge mekemeler halyqaralyq standarttar men joǵary deńgeıdegí sportshylardy dayarlau talabyna saı keletín sporttyq qūral-jabdyqpen tolyq qamtamasyz etílgen.
Sondaı-aq metsenattar men demeushílerdíń úlesíne erekshe nazar audaryldy. 2025 jyly bıznes ókílderíníń qoldauynyń arqasynda almatylyq sportshylarǵa shamamen 400 mln teńge kólemínde qosymsha kómek kórsetíldí.
Almatyda joǵary jetístíkter sportyn júıelí qoldau qala ákímí Darhan Satybaldynyń tapsyrmasymen júzege asyp jatyr. Onyń bastamalary men sport salasyn damytuǵa kórsetíp otyrǵan erekshe nazarynnyń arqasynda qalada halyqaralyq deńgeıdegí sportshylardy dayarlau úshín qajettí jaǵdaılar jasaldy, sondaı-aq memleket pen áleumettík jauapty bıznestíń arasyndaǵy baılanys pen yntymaqtastyq ta nyǵaya túsken.
«Bıznes ókílderíníń būǵan beı-jaı qaraı almaı, sportty damytuǵa belsene aralasyp, sportshylarymyzdy qoldap, olardy jańa jeńíske jetuge yntalandyryp, úles qosyp jatqany quantady», – deıdí Darhan Nūrhanūly.
Sport basqarmasy basshysynyń aıtuynsha, memleket pen jeke sektor arasyndaǵy yntymaqtastyq joǵary jetístíkter sportyn damytuda mańyzdy faktorǵa aınaldy. Byudjet qarjysy men byudjetten tys qoldaudyń úılesuí sportshylardyń daıyndyq deńgeıín arttyruǵa ǵana emes, bolashaqtaǵy halyqaralyq jetístíkterge berík negíz qalauǵa múmkíndík beríp otyr.
Baspasóz konferentsıyasynyń qorytyndysynda Almatyda sportshylar men sport ūıymdaryn qoldau jaǵy aldaǵy uaqytta da keńeıe túsetíní, áleumettík jauapty bıznestí osy íske tartu qalanyń Sport basqarmasynyń negízgí baǵyttarynyń bírí bolyp qala beretíndígín atap óttí.