Almaty qalasy Nauryzbaı audanynyń komyunıtı-ortalyǵynda jastar jáne qoǵamdyq ūıymdardyń ókílderí, komyunıtı-ortalyqtardyń jetekshílerí men sarapshylardyń qatysuymen ashyq dıalog óttí. Talqylau barysynda qatysushylar konstıtutsıyalyq reformalar jónínde óz píkírlerín bíldíríp, Negízgí zańnyń qoǵam ómíríndegí rólín atap óttí.
Almaty qalasynyń belsendí jas ókílí Aqarys Tórebekov jastardyń Qazaqstan Respublıkasynyń damuyna qosatyn úlesíníń mańyzyn erekshe atap óttí:
«Men, belsendí jas ókíl retínde, Qazaqstan Respublıkasynyń damu strategıyasyn jetíldíruge jáne jańǵyrtuǵa baǵyttalǵan árbír reformany qoldaımyn. Jastar jańa jobalar jasap, qoǵamdaǵy tūraqtylyqqa úles qosyp, ózderíníń jan-jaqty damuy úshín eńbek etuí tıís. Būl bastamany tolyq qoldaımyn jáne jaqyn bolashaqta bízdí úlken jetístíkter kútíp tūrǵanyna senemín».
Óz kezegínde «Jetísu-2» komyunıtı-ortalyǵynyń jetekshísí Aıbek Beríkbolūly jańa Konstıtutsıyanyń tsıfrlandyru jaǵdaıynda adam qūqyqtaryn nyǵaıtuǵa yqpal etetínín aıtty:
«Meníń oıymsha, Konstıtutsıya – eń aldymen memleketímízdíń tíregí. Ol – eldíń írgetasy árí qoǵamymyzdyń damuyna negíz bolatyn qūjat. Búgínde Konstıtutsıya normalarynyń shamamen 84 paıyzyna ózgeríster engízíldí, onyń íshínde būryn tsıfrlyq qauípsízdík máselelerín tolyq qamtymaǵan baptar da bar. Qazírgí zamanda asa mańyzdy sanalatyn tsıfrlyq qauípsízdík salasyndaǵy adam qūqyqtary osy ózgeríster ayasynda berík qūqyqtyq negízge ıe bolady».
Ís-sharaǵa qatysqan Almaty qalasy «Jaryq» bírlestígíníń múshesí Jasūlanūly Beıbít kezdesudíń mańyzdylyǵyna toqtalyp, erekshe formatta ótkenín atap óttí:
«Búgíngí kezdesu – aldaǵy bolatyn referendum úshín mańyzdy oqıǵa ekenín atap ótkím keledí. Konstıtutsıyanyń jańa jobasy arqyly bíz óz qūqyqtarymyz ben míndetterímízdí tereńírek túsíníp, azamattyq jauapkershílígímízdí arttyruǵa múmkíndík aldyq. Bíz elímízdíń damuyna jáne qūqyqtyq reformalardyń tabysty júzege asuyna óz úlesímízdí qosu úshín osy bastamany qoldaımyz.»
Ótken breınstormıng Almaty jastarynyń eldegí sayası úderísterge beıjaı qaramaıtynyn jáne memlekettík bastamalarǵa jan-jaqty qoldau kórsetuge daıyn ekenín kórsettí.
