19 sáuír Almatyda toǵyzynshy ret Almaty Half Marathon jartylaı marafony ótedí, – dep habarlaıdy aqshamnews.kz tílshísí.
Ís-sharany «Bírínshí bolu – batyldyq» korporatıvtík qory qala ákímdígíníń qoldauymen ūıymdastyryp otyr. Kóktemgí jarysqa álemníń 44 elínen 10 myńnan astam adam qatysady. Qatysu úshín almaty-marathon.kz saıty arqyly tírkeluge bolady.
Qatysushylarǵa dástúrlí qashyqtyqtar ūsynylady: jartylaı marafon (21,1 km), 10 km, 10 km (skandınavıyalyq júrís) jáne «Ekıden» komandalyq estafetasy. Jartylaı marafonǵa 18 jastan asqan azamattar qatysa alady, al qalǵan qashyqtyqqa 15 jastan bastap rūqsat etíledí.
Jarysqa qatysushylar tau bókteríndegí Almatynyń ásem kóshelerímen júgíríp ótedí. Sóre ál-Farabı dańǵyly boıyndaǵy Tūńǵysh Prezıdent sayabaǵy mańynan bastalyp, máre Ortalyq stadıonda ayaqtalady.
Jalpy jarysqa 44 elden 10 myńnan astam adam qatysady. Qatysushylardyń dení kórshíles Reseı, Qyrǵyzstan jáne Ózbekstan elderínen bolsa, sonymen qatar Frantsıya, Germanıya, Kanada, Ońtústík Koreya, Japonıya, Avstralıya jáne Ońtústík Afrıka sekíldí alys memleketterdíń ókílderí de bar.
Jarysty ūıymdastyryp otyrǵan «Bírínshí bolu – batyldyq» korporatıvtík qory 2012 jyldan berí Ortalyq Azıyadaǵy eń írí júgíru sharasy – Almaty Marathon jáne basqa da būqaralyq jarystardy tūraqty túrde ótkízíp keledí. Qor ūıymdastyratyn jarystar 115 eldegí 445-ten astam marafondy bíríktíretín AIMS halyqaralyq qauymdastyǵynyń resmı kúntízbesíne engízílgen. Al jartylaı marafon baǵyty World Athletics talaptaryna sáıkes sertıfıkattalǵan.
«Bírínshí bolu – batyldyq» korporatıvtík qorynyń atqarushy dırektory Saltanat Qazybaevanyń aıtuynsha, qatysushylardyń qauípsízdígín qamtamasyz etu maqsatynda arnaıy basqaru ortalyǵy jūmys ísteıdí. Onyń qūramyna Almaty qalalyq polıtsıya departamentíníń ókílderí, jarystyń bas dárígerí jáne ūıymdastyrushylar kíredí. Sonymen qatar «Sergek» beınebaqylau júıesí qoldanylady. Jarys boıynda 13 velomedık, 90 medıtsınalyq eríktí, 8 medıtsınalyq beket jáne 10 jedel járdem kólígí qyzmet kórsetedí. Márege jetu aımaǵynda qyzyl jáne sary aımaqtarǵa bólíngen arnaıy medıtsınalyq gospıtal ūıymdastyrylady. Jalpy alǵanda, medıtsınalyq qamtamasyz etuge 30-dan astam dáríger men orta buyn mamandaryn tartu josparlanyp otyr.
«Júgíru jarystary qala ekonomıkasyna oń áser etumen qatar, bíz qatysushylar úshín jaǵdaıdy júıelí túrde jaqsartyp kelemíz. Máre aımaǵynda ana men bala bólmesí bar, erler men áıelderge arnalǵan jeke ájethanalar qarastyrylǵan, sondaı-aq múmkíndígí shekteulí azamattarǵa beıímdelgen arnaıy sanıtarlyq toraptar ornatylǵan. Būl tájírıbe Qazaqstandaǵy júgíru jarystary arasynda alǵashqylardyń bírí bolyp engízílgen. Bıyl jarysty ūıymdastyruǵa 900-den astam eríktí jūmyldyrylady. Sonymen qatar áleumettík jáne ekologıyalyq bastamalar da júzege asyryluda: qaldyqtardy bólek jınau júıesí engízílíp, «Jylu» jobasymen bírlesíp mūqtaj jandarǵa arnalǵan kıím jınau aktsıyasyn ótkízemíz», - dedí Saltanat Qazybaeva.
2024 jyly júrgízílgen «Almaty Marathon-nyń qala ekonomıkasyna áserí» atty zertteu nátıjesí marafonnyń Almaty ekonomıkasyna aıtarlyqtaı oń yqpal etetínín kórsettí. Jarys ótetín ekí kún íshínde shamamen myńǵa juyq qatysushy 8 mıllıon teńgege juyq qarjy jūmsaıdy. Sonymen qatar seríktes kompanıyalardyń salyqtyq audarymdary sońǵy tórt jylda 318,9 mıllıon teńgeden 873,9 mıllıon teńgege deıín artqan.
Qalada júgíru mádenıetí men ınfraqūrylymy qarqyndy damyp keledí: búgínde Almatyda 40-qa juyq júgíru kluby jūmys ísteıdí, al tamaqtanu, medıtsına jáne sporttyq jabdyqtar salalary júıelí túrde órkendep keledí.
Sonymen qatar ózge óńírler men elderden kelgen qatysushylardyń 79,3%-y Almatyǵa qaıta keludí josparlap otyr. Būl qalaǵa degen qyzyǵushylyqtyń, turıster sany men ınvestıtsıyalyq tartymdylyqtyń arta túskenín kórsetedí.
Almaty Marathon halyqaralyq deńgeıde de joǵary baǵalanyp otyr. Atap aıtqanda, ol Mastercard kompanıyasy men Almaty Tourism Bureau bírlesíp daıyndaǵan qalanyń turıstík áleuetíne arnalǵan zertteuge engízílíp, írí sporttyq ís-sharalardyń turıster sany men ekonomıkalyq belsendílíkke yqpaly erekshe aıtylǵan.
Aıta keteıík, bıylǵy Almaty Marathon 27 qyrkúıekte ótedí, oǵan 16 myń adamǵa deıín qatysady dep boljanyp otyr. Dástúr boıynsha tírkeu jarnalarynyń bír bólígí qaıyrymdylyqqa baǵyttalyp, 2012 jyldan berí jalpy qūny 300 mıllıon teńgeden asatyn 30-dan astam áleumettík jáne medıtsınalyq joba júzege asyrylǵan. Jarysqa qatysu úshín almaty-marathon.kz saıty arqyly tírkeluge bolady.