Almaty ákímí Darhan Satybaldy jūmys sapary ayasynda Qazaqstan Respublıkasy Atom energıyasy jóníndegí agenttígíníń Yadrolyq fızıka ınstıtutyna bardy, dep habarlaıdy aqshamnews.kz
Būl atom energıyasyn beıbít maqsatta paıdalanu salasynda ǵylymı-zertteu jáne tájírıbelík-konstruktorlyq qyzmettíń tolyq tsıklí bar eldegí jalǵyz ǵylymı ūıym. Mūnda írgelí jáne qoldanbaly zertteuler júrgízíledí, jańa tehnologıya ázírlenedí, óndírís jūmys ísteıdí jáne atom salasyna mamandar dayarlanady.
Qala basshysy zamanauı zerthanalardyń jáne tájírıbelík qondyrǵylardyń jūmysymen tanysty. Olardyń arasynda VVR-K zertteu reaktory, radıohımıya jáne ızotoptar óndírísí jóníndegí ǵylymı-tehnıkalyq ortalyq bar. Instıtutta onkologıyalyq aurulardy dıagnostıkalau men emdeuge arnalǵan radıofarmpreparattar shyǵarylady. Búgínde Qazaqstandaǵy radıofarmatsevtıkalyq ónímníń shamamen 85%-yn osy ınstıtut óndíredí. Preparattar Almaty, Astana, Shymkent, Semeı medıtsınalyq ūıymdaryna jetkízíledí, sondaı-aq ónerkásíptík radıoızotoptar Reseı, Germanıya, AQSh jáne Frantsıyaǵa eksporttalady.
Instıtut bazasynda MAGATE men AQSh Energetıka mınıstrlígíníń qoldauymen ashylǵan úsh oqu ortalyǵy jūmys ísteıdí. Osy uaqyt íshínde mūnda shamamen 5000 maman dayarlandy. Instıtut 30-dan astam halyqaralyq ǵylymı qūrylymdar jáne unıversıtettermen seríktestík ornatqan, al 2023 jyly CERN ǵylymı kollaboratsıyasyna qosyldy.
Ákím Yadrolyq fızıka ınstıtutynyń maman dayarlau, ǵylymı áleuettí damytu jáne halyqaralyq seríktestíktí keńeıtu baǵytyndaǵy rólín atap óttí. Ol ǵylymnyń qalanyń ózektí míndetterín sheshuge ıntegratsıyalanuy asa mańyzdy ekenín aıtty. Ǵylymı ūıymdar, joǵary oqu oryndary jáne qalalyq qyzmetterdíń ózara ís-qımyly júıelí boluǵa tıís.
Darhan Satybaldy Memleket basshysy Qasym-Jomart Toqaevtyń jergílíktí atqarushy organdardyń bílím beru jáne zertteu ortalyqtarymen tyǵyz yntymaqtastyǵyn qamtamasyz etu turaly tapsyrmasyn eske saldy. Osyǵan baılanysty ákím ınstıtutqa qalalyq ınfraqūrylymǵa arnalǵan sheshímder men ınnovatsıyalyq tehnologıyany engízudí qamtıtyn bírlesken jobalar boıynsha naqty ūsynystar ūsynudy tapsyrdy.