Kásibı mereke qarsańynda Almaty ákimi Darhan Satybaldy aýyl sharýashylyǵy salasyn damytýǵa, azyq-túlik qaýipsizdigin qamtamasyz etýge jáne megapolısti sapaly ónimmen turaqty qamtamasyz etýge eleýli úles qosqan agroónerkásip salasynyń úzdik ókilderin memlekettik nagradalarmen marapattady.
İs-shara barysynda Almaty ákimi agroónerkásip kesheniniń strategıalyq mańyzyn atap ótip, Prezıdent Qasym-Jomart Toqaevtyń aýyl sharýashylyǵyn ulttyq qaýipsizdiktiń negizgi baǵyttarynyń biri retinde damytýǵa erekshe kóńil bólip otyrǵanyn aıtty. Qaıta óńdeý kásiporyndary, logıstıkalyq ınfraqurylym jáne ǵylymı-bilim berý ortalyqtarynyń arqasynda Almaty agrarlyq tizbektiń mańyzdy býynyna aınalyp otyr.
Saltanatty rásim aıasynda "Parasat" ordeni Qazaq ulttyq agrarlyq zertteý ýnıversıtetiniń "Agronomıa, seleksıa jáne bıotehnologıa" kafedrasynyń profesory Tastanbek Ataqulovqa jáne "Maslo-Del" JSHS bas dırektory Pavel Selıvanovqa tabystaldy. "Eren eńbegi úshin" medalimen "Sın-Kaz" JSHS zerthana meńgerýshisi Aıman Kúderına marapattaldy. Bul nagradalar - sala mamandarynyń kópjyldyq adal eńbegi men kásibıligine, agrarlyq sektordyń damýyna qosqan zor úlesine berilgen joǵary baǵa.
Qala ákimi aýyl sharýashylyǵy salasynda eńbek etip júrgen barsha mamandarǵa rızashylyǵyn bildirip, agroónerkásip sektoryna qoldaý kórsetý jumysy júıeli túrde jalǵasatynyn atap ótti.
Búginde Almatyda agroónerkásip salasynda 60-qa jýyq kásiporyn jáne azyq-túlik óndiretin 300-den astam kompanıa jumys isteıdi. Aıta keteıik, Qazaqstanda qarashanyń úshinshi jeksenbisinde aýyl sharýashylyǵy qyzmetkerleriniń kúni dástúrli túrde atalyp ótedi.