Ótken jylǵy oqushylar arasyndaǵy zıyatkerlík jarystardyń qorytyndysy Almatynyń respublıkalyq deńgeıdegí tūraqty kóshbasshylyǵyn taǵy bír márte dáleldedí. Būl turaly qalalyq Bílím basqarmasy 2025 jyldyń jūmys qorytyndysyn jarıyalau barysynda aıtty.
Qala qūramasy qatarynan 23-shí ret Qazaqstannyń úzdík olımpıadalyq komandasy atanyp, jalpykomandalyq esepte taǵy da bírínshí oryn ıelendí. Jyl qorytyndysy boıynsha jaratylystanu-matematıkalyq baǵyttaǵy júldelí oryndar sany 37-den 41-ge deıín artty. Al qoǵamdyq-gumanıtarlyq baǵytta Almaty komandasy Bas júldení jeńíp aldy.
2025 jyly halyqaralyq olımpıadalarda 538 júldeger daıyndaldy. Vedomstvo málímetínshe, qatysushylar qūramyn tıímdí retteu barysynda eń myqty oqushylardy sapaly dayarlau men atauly qoldauǵa basymdyq berílgen. Halyqaralyq jarystarǵa 670 oqushy qatysyp, olardyń 538-í júldeger atandy. Respublıkalyq olımpıadalarda 600 oqushy baq synap, 335-í jeńímpaz boldy.
Būqaralyq sport salasynda da oń dınamıka baıqaldy. Qalalyq sporttyq ís-sharalarǵa 153 myńnan astam oqushy qatysyp, respublıkalyq deńgeıdegí jeńíster sany artty. Áskerı-patrıottyq tárbıe baǵytynda da joǵary nátıje tírkeldí.
Almaty mektepterí men qūrama komandalary dástúrlí túrde ūlttyq jáne halyqaralyq jarystardyń kóshbasshylary qatarynda. Oqushylar Ūlttyq mektep lıgasy, WorldSkills chempıonaty, ınklyuzıvtí spartakıadalar, pándík olımpıadalar jáne toǵyzqūmalaqtan álemdík bírínshílíkterge deıín qatysyp keledí. Máselen, Almatydaǵy segíz arnaıy mektep-ınternattyń oqushylary «Jūldyzaı-2025» ūlttyq ınklyuzıvtí oıyndarynda bírínshí orynǵa ıe bolyp, respublıkalyq jáne halyqaralyq jarystardyń júldegerí atandy.