200 tonnadan astam túrlí alma sorttary ūsynylady, dep habarlaıdy aqshamnews.kz tílshísí.
Qala kúníne oraı Almatyda 19-20 qyrkúıekte Panfılov jáne Jíbek joly júrgínshíler kóshelerí boıynda qala tūrǵyndary men qonaqtaryna arnalǵan auqymdy Alma Qala Fest festıvalí ótedí. Mádenı ís-shara baǵdarlamasy Almatynyń tarıhy men zamanauı kelbetín tanystyruǵa, ūlttyq mádenıet pen dástúrdí dárípteuge, shyǵarmashylyq ındustrıyany qoldauǵa jáne qala tūrǵyndaryna túrlí formattaǵy demalys ūsynuǵa baǵyttalǵan.
Festıval aumaǵynda bírneshe taqyryptyq aımaq jūmys ísteıdí. Kelushíler mádenıet, óner, sport, ekologıya, tsıfrlyq tehnologıya, gastronomıya jáne balalarǵa arnalǵan túrlí oıyn-sauyq baǵdarlamalaryna qatysa alady.
Festıvaldíń negízgí bólíkteríníń bírí – alma sharuashylyqtarynyń jármeńkesí. Oǵan Almaty óńíríníń 50 alma sharuashylyǵy qatysyp, 200 tonnadan astam túrlí sorttaǵy alma ūsynady. Panfılov pen Qazybek bı kóshelerí mańyndaǵy alańda kelushíler otandyq óndírushílerdíń ónímderímen tanysyp, almanyń aluan túrínen dám tata alady.
«Almaty» kórme aımaǵynda qalanyń tarıhyn, sáuletín, tabıǵatyn jáne ózíndík bolmysyn beıneleıtín kartınalar kórmesí ūıymdastyrylady. Al Elshílíkter alleyasynda qatysushy elderdíń mádenıetí men dástúrí tanystyrylady. Kórme barysynda ūlttyq óner, qolóner būıymdary, dástúrlí mádenı qūndylyqtar men túrlí elderdíń erekshelíkterí ūsynylady.
Festıvaldíń zamanauı aımaqtarynyń bírí – Digital Zone. Mūnda tsıfrlyq tehnologıya men ınteraktıvtí jobalar ūsynylyp, Almaty tarıhyna arnalǵan AI tehnologıya negízíndegí aqparattyq-tanymdyq ınstallyatsıyalar jūmys ísteıdí. Sonymen qatar kelushíler arqan tartys, sadaq atu jáne basqa da ınteraktıvtí oıyndarǵa qatysa alady.
Eco Zone ekologıyalyq bastamalar men jobalardy tanystyruǵa arnalsa, Ethno Zone ūlttyq mádenıet, dástúr men qolónerdí nasıhattaıdy. Etnoaımaqta qolónershíler jármeńkesí ótíp, kelushíler úshín túrlí sheberdíń sabaqtary ūıymdastyrylady.
Belsendí demalysty ūnatatyndar úshín Sport Zone jūmys ísteıdí. Mūnda sporttyq oıyndar, estafetalar jáne ūlttyq oıyndar ótkízíledí. Balalarǵa arnalǵan arnaıy aımaqta kíshkentaı qonaqtar úshín túrlí oıyndar, anımatorlar, batuttar, akvagrım, sabyn kópírshíkterí shouy, azot shouy jáne basqa da oıyn-sauyq baǵdarlamalary ūıymdastyrylady. Festıval qonaqtary úshín Almatynyń gastronomıyalyq áleuetín tanystyratyn 25 qalalyq meıramhana qatysatyn arnaıy aımaq ta jūmys ísteıdí.
Kınosúıer qauym úshín arnaıy kıno aımaǵy jūmys ísteıdí. Baǵdarlama ayasynda «Jas emes jūbaılar», «Mádı in China», «Synyptas», «Qolymnan ūsta», «Zaman Back», «Mafıya» jáne qazaq kınosynyń altyn qoryna engen fılmder kórsetíledí. Sonymen qatar kórermender «Zaman Back» jáne «Famılıya» fılmderíníń akterlerímen arnaıy kezdesulerge qatysa alady.
Festıvaldíń muzykalyq jáne shyǵarmashylyq baǵdarlamasy bírneshe sahnada ótedí. Bas sahnada (Astana alańy) FEA «Otyrar sazy», MuzartLIFE, Raıym Uaıys, «Ádemí aı» duetí, Qūdaıbergen Bekísh jáne Erkebūlan Qūmarov óner kórsetedí. Kíshí sahna №1-de (T. Júrgenov atyndaǵy Qazaq ūlttyq óner akademıyasy janyndaǵy sahna) Álı Oqapov, Mádı Rymbaev, Aqerke Amalyat, Nūrmūhammed Jaqyp, «Hazar» toby, Daro jáne Venera Alpysbaeva óner kórsetedí. Al Kíshí sahna №2-de (Jíbek joly kóshesí) Live band Rockn rolla óner kórsetíp, ımmersıvtí quyrshaq teatrynyń qoıylymy ūsynylady. Sondaı-aq «Astra» toby, Nūrdáulet Karlov, Álem Qūsaıynova jáne Azamat Tórehan óner kórsetedí.
Atauly merekelík ís-sharalarǵa baılanysty Tóle bı jáne Qazybek bı kósheleríníń Abylaı han dańǵyly men Nazarbaev dańǵyly aralyǵyndaǵy uchaskelerí 17 qyrkúıek saǵat 15:00-den 21 qyrkúıek saǵat 03:00-ge deıín uaqytsha jabylady.