Qazaqstan Respublıkasynyń Mádenıet jáne aqparat mınıstrí Aıda Balaevanyń jetekshílígímen Aqtauda TÚRKSOI elderí mádenıet mınıstrleríníń 42-otyrysy óttí.
Jıynda Ázerbaıjandaǵy Gabala qalasynda ótken Túrkí memleketterí ūıymynyń XII sammıtínde jarıyalanǵan qorytyndy qūjattar men prezıdentterdíń tapsyrmalary talqylandy.
Otyrys barysynda 2026 jylǵa arnalǵan TÚRKSOI ūıymynyń jūmysyn jetíldíru boıynsha jūmys tobyn qūru turaly sheshím qabyldandy.
Sonymen qatar "Aqtau – Túrkí álemíníń mádenı astanasy" jylynyń qorytyndysy shyǵaryldy. Aıda Balaeva óz sózínde aıtuly jyl ayasynda keń auqymdy jūmys atqarylǵanyn atap óttí.
Jıynda TÚRKSOI Bas hatshysy Sūltan Raev qūttyqtau sóz sóıledí. Ol bıyl ūıym úsh myńnan astam ártístíń túrlí ís-sharalarǵa qatysuyn ūıymdastyryp, júzdegen basylym men tsıfrlyq materıal shyǵarǵanyn tílge tıek ettí.
"2025 jyly "Aqtau – túrkí álemíníń mádenı astanasy" jobasyn qoldaǵany úshín Qazaqstan Respublıkasynyń Prezıdentí Qasym-Jomart Toqaevqa shynaıy alǵysymdy bíldíremín. Gabalada ótken sammıtte Qazaqstan Prezıdentíníń sóılegen sózí būl mártebeníń ortaq mádenı keńístígímíz úshín mańyzyn aıqyndaı tústí. Bıyl bíz tarıhı oqıǵanyń kuásí boldyq: memleket basshylary uaqyt talabyna saı TÚRKSOI-dy nyǵaıtu qajettígín atap, Bas hatshylyqqa osy jūmysty bastaudy tapsyrdy. Būl jaı ǵana sheshím emes – túrkí álemí elderíníń mádenı yntymaqtastyǵynyń bolashaǵyn aıqyndaıtyn strategıyalyq kezeń", – dedí Bas hatshy.
Otyrys ayaǵynda Aıda Balaeva 2026 jyly Túrkí álemíníń mádenı astanasy mártebesí Ándíjan qalasyna beríletín bolǵandyqtan, TÚRKSOI-dyń uaqytsha úılestírushísí míndetín ózbekstandyq áríptesí Ozodbek Nazarbekovke tapsyrdy.
Kezdesudíń sońynda TÚRKSOI-ǵa múshe elderdíń deklaratsıyasy qabyldandy.
Otyrysta QR Mádenıet jáne aqparat mınıstrí Aıda Balaeva, TÚRKSOI Bas hatshysy Sūltan Raev, Túríkmenstannyń mádenıet mınıstrí Atageldy Shamyradov, Ózbekstannyń mádenıet mınıstrí Ozodbek Nazarbekov, Ázerbaıjan Mádenıet mınıstríníń orynbasary Murad Guseınov, Qyrǵyzstan Mádenıet, aqparat, sport jáne jastar sayasaty mınıstríníń orynbasary Askaraly Madamınov, Túrkıya Mádenıet jáne turızm mınıstríníń orynbasary doktor Serdar Cham, sondaı-aq Mańǵystau oblysy ákímíníń orynbasary Tílegen Ábíshev qatysty.
Túrkí mádenıetí halyqaralyq ūıymy (TÚRKSOI) ortaq materıaldyq jáne mádenı mūrany saqtau, damytu jáne bolashaq ūrpaqqa jetkízu maqsatynda túrkí elderí men aımaqtaryn bíríktíru maqsatynda qūrylǵan.