Búgín Almaty qalasynda belgílí akter Djekı Channyń qatysuymen túsíríletín Armour of God: Ultimatum («Dospehı boga: Ultımatum») halyqaralyq kórkem fılmíníń óndírísín resmı túrde bastau rásímí óttí, – dep habarlaıdy aqshamnews.kz tílshísí.
Saltanatty ís-sharaǵa QR Premer-Mınıstríníń orynbasary – Mádenıet jáne aqparat mınıstrí Aıda Balaeva, Almaty qalasynyń ákímí Darhan Satybaldy, Almaty oblysynyń ákímí Marat Sūltanǵazıev, sondaı-aq qazaqstandyq jáne halyqaralyq kınoındustrıya ókílderí qatysty.
Úkímet basshysynyń orynbasary Djekı Channyń Qazaqstan men Qytaı arasyndaǵy mádenı-gumanıtarlyq baılanystardy damytuǵa qosyp otyrǵan úlesín joǵary baǵalady.
«Qazaqstan mádenıetín álemdík arenada tanytuǵa jáne ekí el arasyndaǵy mádenı-gumanıtarlyq baılanysty nyǵaıtuǵa qosyp otyrǵan úlesíńíz úshín Sízge alǵys bíldíremín. Aldaǵy túsírílím jūmystaryna sáttílík, jańa shyǵarmashylyq tabystar tíleımín», – dedí Aıda Balaeva.
Kezdesu barysynda Djekı Chan Almatynyń talantty jas suretshílerímen jáne T. Júrgenov atyndaǵy Qazaq ūlttyq óner akademıyasynyń túlekterí – jas kınematografıstermen áńgímelestí. Ol jastarǵa shyǵarmashylyq jolda tabys tílep, úzdíksíz ízdenís pen óz ísíne degen súıíspenshílíktíń mańyzyn atap óttí. Kezdesu sońynda balalar áıgílí akterge ózderí salǵan portretterdí tartu ettí.
Ís-shara sońynda qatysushylar dástúrlí túsírílím taqtaıshasymen estelík suretke tústí. Osylaısha fılm óndírísíníń resmı bastalǵany aıshyqtaldy.
Joba QR Mádenıet jáne aqparat mınıstrlígíníń jáne Qytaıdyń memlekettík kınokompanıyasy China Film Group Corporation-nyń qoldauymen júzege asyryluda. Fılm óndírísímen qazaqstandyq Sálem Entertainment kompanıyasy jáne gonkongtyq Billion Target kompanıyasy aınalysady.
Fılm túsírílímí 2026 jylǵy shílde men qazan aılary aralyǵynda Qazaqstan aumaǵynda ótedí. Kartınanyń qoyushy rejısserí – qazaqstandyq Robert Kun. Tuyndy keń halyqaralyq prokatqa baǵyttalǵan. Negízgí túsírílím alańdary Almaty qalasynda, Almaty jáne Mańǵystau oblystarynda ornalasady.
Būl joba Qazaqstan úshín strategıyalyq árí ımıdjdík tūrǵydan mańyzdy. Onyń júzege asyryluy elímízdíń mádenı, turıstík jáne ınvestıtsıyalyq áleuetín ílgeríletuge, kınoturızmdí damytuǵa, halyqaralyq yntymaqtastyqty nyǵaıtuǵa jáne Qazaqstandy álemdík deńgeıdegí írí kınojobalardy túsíruge qolaıly zamanauı alań retínde keńínen tanytuǵa yqpal etedí.