Jýyrda áleýmettik jelide Almaty qalasynyń ortalyq kósheleriniń birinde patrúldik polısıa qyzmetkeriniń moped aıdaǵan sheteldik azamatpen aǵylshyn tilinde sóılesken vıdeosy tarady. Kópshilik bul sátti erekshe jyly qabyldap, tártip saqshysynyń biliktiligi men sypaıylyǵyna joǵary baǵa berdi. Bul oqıǵanyń mán-jaıyn Aqshamnews.kz tilshisi anyqtap kórdi.
Beınejazbada polısıa kapıtany ózin qyzmettik etıketke saı tanystyryp:
– Saýlyǵyńyzdy tileımin, polısıa kapıtany Seısenbaev, – dep sheteldik azamatqa jaqyndaıdy. Alaıda moped júrgizýshisi:
– Sorry! I don’t speak Russian, – dep, orys tilinde sóıleı almaıtynyn jetkizedi.
Polısıa qyzmetkeri esh tosylmaı, aǵylshyn tilinde erkin dıalog quryp ketedi. Týrıs ózin Aleks dep tanystyryp, Italıalyq ekenin, Avstralıadan kele jatqanyn jáne 10 shaqty eldi aralaǵanyn aıtyp beredi. Aldaǵy baǵyty – Reseı eken.
– Bizdiń elimiz týraly ne oılaısyz? – degen suraqqa sheteldik:
– Óte ádemi, maǵan bul memleket unaıdy, – dep jaýap beredi.
Kapıtan Seısenbaev oǵan qajetti jaǵdaıda «102» nómirine habarlasýǵa bolatynyn aıtyp, qoshtasady. Aǵylshyn tilinde erkin sóılegen polısıa qyzmetkeri bul áreketi arqyly sypaıylyqtyń da úlgisin de tanytqandaı.
Vıdeo áleýmettik jelide keńinen tarap, jeli qoldanýshylary bul kóriniske tamsana pikir qaldyrdy:
«Jaraısyń! Jigitke jeti óner de az»,
«Basqa planetanyń polıseıi shyǵar)))»,
«Qazaqstanda da osyndaı qyzmetker bar ekenine sengim keledi»,
«Arnaıy túsirilgen shyǵar»,
«Jaraısyń! Mektepte aǵylshyn tilin jaqsy oqyǵan ǵoı deımin» – dep jarysa jazdy qoldanýshylar.
Bul jaǵdaıdyń anyq-qanyǵyn bilý maqsatynda biz polısıa kapıtany Nurbolsyn Seısenbaevqa habarlastyq. Ol oqıǵanyń shynaıy ekenin rastady. Aǵylshyn tilin qaıdan meńgergenin suraıyq degenimizde:
– Jumys barysynda kez kelgen jaǵdaı bolýy múmkin. Qazir qyzmet barysyndamyn, ýaqytym tyǵyz, – dep qysqa qaıyrdy.
Qalaı bolǵanda da, bul oqıǵa – polısıa ımıjine oń áser etip, halyqtyń senimin arttyrǵan jarqyn mysalǵa aınaldy.